Uthukela News Times Plus

Name: Uthukela News Times Plus
Address: 150 Murchison Street, Office No. 4, Ladysmith, 3370, ZA
Telephone: +27738577713

Home
South Africa
Ladysmith
Uthukela News Times Plus

Call Directions Website Contact the business

"Izindaba zasoThukela zinjengoba zinjalo." To report news and business: 083 2972 906

29/10/2026

Amalungu omphakathi abhikishile ngaphandle kweNkantolo yeMantshi yaseMnambithi namuhla,ephikisana nokukhishwa ngebheyili kukaThamsanqa David Ngubane, osolwa ngokudubula umkakhe kuJasmin Street eAcaciavale.

UNgubane ubhekene nezinsolo zokudubula kubulawe owesifazane okubikwa ukuthi umkakhe oneminyaka engu-34 ubudala e-Acaciavale ngomhlaka 19 Kwephezulu.kanti wazinikela emaphoyiseni ngoLwesibili, waphinde wanikela ngesibhamu okusolwa ukuthi yisona esisetshenziswe ekubulaweni komkakhe.

Okhulumela amaphoyisa, uWarrant Officer Basheer Khan, ukuqinisekisile ukuthi umsolwa ubesezandleni zamaphoyisa.

29/10/2026

U-HLABISA UNXUSE AMAKHOSI UKUTHI AVIKELE IZINHLELO ZENTUTHUKO

UNgqongqoshe wezokubusa ngokubambisana nezindaba zomdabu kuzwelonke, uVelenkosini Hlabisa, ucele amakhosi nemiphakathi ukuthi bavikele izinhlelo zentuthuko ukuze zingacekelwa phansi.

Ubekhuluma ngesikhathi kuvulwa kabusha isikhungo samanzi iSampofu Water Supply Scheme kuWard 3, kuMasipala waseMsinga,ngaphansi kwesifunda uMzinyathi. Lomsebenzi ubize imali engu-R4.443 million kanti uzohlinzeka ngamanzi eziphehlimanzini ezingu-43 esifundeni.

Lesi sikhungo saqala ukwakhiwa ngo-2010 kodwa umsebenzi wamiswa kulandela izinsolo zokucekelwa phansi kwengqalasizinda singakaqedwa.
UHlabisa uthe ukucekelwa phansi kwengqalasizinda kubuyisela emuva imiphakathi, wagqugquzela abantu ukuthi babike labo abacekela phansi izikhungo emaphoyiseni nakonogada bakamasipala.

29/10/2026

IMeya yomkhandlu wesifunda uThukela, iNkosi Ntandoyankosi Shabalala isenikezwe usuku lwakusasa ukuze afakaze ecaleni lenkohlakalo nokugwazela elibhekene noMM walomkhandlu.

UShabalala uthi ucela uJili anikezwe ibheyili ukuze ezokhona ukuqhubeka noksebenzi wakhe.

29/10/2026

KUVULWE INDAWO YAMABHIZINISI AMANCANE EMPOPHOMENI

UMnyango wezokuThuthukiswa koMnotho, ezokuVakasha nezeMvelo KwaZulu-Natal, ngokubambisana noMasipala waseMngeni oholwa uMeya uChris Pappas unikezele ngesakhiwo samabhizinisi amancane eMpophomeni.

UMnyango ufake imali eyizigidi ezingu-R2.4 ngaphansi kohlelo lokuthuthukisa ingqalasizinda yamabhizinisi angekho emthethweni.Amabhizinisi amancane angu-11 azohlomula ngokuthola izindawo zokusebenzela, ngenhloso yokukhulisa osomabhizinisi bendawo, ukudala amathuba okuziphilisa nokuthuthukisa umnotho womphakathi.Lephrojekthi ihlose ukuqinisa amabhizinisi asezilokishini nasezindaweni zasemakhaya KwaZulu-Natal.

29/10/2026

UMKHWANAZI UQOKELWE UKUHOLA OKLEBE KUZWELONKE

UNgqongqoshe wamaPhoyisa obambile, uFiroz Cachalia, useqalise uhlelo lokuqoka uKhomishana wamaPhoyisa KwaZulu-Natal, uNhlanhla Mkhwanazi, ukuba abe yinhloko yoKlebe kuzwelonke.

UCachalia usehambise umbiko kuKhabhinethi ecela imvume yalokhu kuqokwa kukaMkhwanazi.Lombiko kulindeleke ukuthi wethulwe emhlanganweni weKhabhinethi ozayo.

UMnyango wamaPhoyisa uthi ukuqokwa kwenhloko kazwelonke kubalulekile ukuze kuqiniswe ubuholi balolu phiko oluphenya ubugebengu obubucayi, okubalwa kubo ubugebengu obuhleliwe nenkohlakalo.Umnyango uthi lokhu kuyingxenye yemizamo yokuqinisa ukulwa nobugebengu eNingizimu Afrika.

29/10/2026

ICALA LIKA MATLALA NASOLWA NABO LIHLEHLISELWE UFEBHUWARI 2027
Icala elibhekene noVusumuzi “Cat” Matlala nabanye abasolwa abathathu lihlehliselwe umhla ziyi-11 kuFebhuwari 2027 eNkantolo yeMantshi yasePitoli ukuze kuqhutshekwe nophenyo.

Abasolwa babhekene namacala ahlobene nezinsolo zokusebenzisa amaphepha omgunyathi ukuze bathole Isakhiwo esiseWaterkloof, empumalanga yePitoli, ngonyaka odlule.

Unkosikazi kaMatlala, uTsakane Matlala, nabanye abasolwa ababili banikezwa ibheyili ka-R20 000 umuntu ngamunye ngenyanga edlule.

Okhulumela iNational Prosecuting Authority (NPA), uLumka Mahanjana, uthe ukuhlehliswa kwecala kumayelana nesidingo sokuhlola izitatimende zezimali zabasolwa ngamunye.Ugcizelele ukuthi lokhu akusho ukuthi icala lombuso libuthaka, kodwa uphenyo lusadinga ukuqedwa ngaphambi kokuba icala lilungele ukuqulwa.

29/10/2026

UMeya kaMasipala weSifunda uThukela, iNkosi Ntandoyenkosi Shabalala,kubikwa ukuthi izongena ebhokisini lofakazi ecaleni elibhekene nemenenja kamasipala, uLangelihle Jili.UJili ubhekene namacala enkohlakalo, kanti iNkosi Shabalala kulindeleke ukuthi ifakaze kuleli cala.Iyaqhubeka inqubo yokufakwa kwesicelo sakhe sebheyili .

29/10/2026

KUBOSHWE ABANTU ABABILI BASE-TANZANIA BETHOLAKALA NENSANGU E-PRIMROSE

Amaphoyisa aseGoli abophe amadoda amabili aseTanzania, aneminyaka ephakathi kuka-25 no-38 ubudala, ngezinsolo zokutholakala nensangu ePrimrose.
Amaphoyisa athole imininingwane ethi lamadoda asolwa ngokudayisa izidakamizwa kule ndawo.Ngesikhathi ephenya indawo,athole izikhwama eziyisithupha ezinensangu.Abasolwa baboshiwe kanti kulindeleke ukuthi bavele enkantolo maduze. Amaphoyisa asaqhubeka nophenyo.

29/10/2026

KUNXUSWE UKUBA KUPHELE UDLAME LKWAMATEKISI E-KAPA

Kubizwe izinhlangano zamatekisi uCATA noCODETA ukuthi ziqede udlame oluhlobene nemizila yamatekisi eKapa, njengoba kuqhubeka ukudubulana okubeka abagibeli engcupheni.Kulimale abantu ababili ngesikhathi kudutshulwana erenki yamatekisi eDelft Palm ngoLwesithathu.

IMeya yaseKapa, uGeordin Hill-Lewis, kanye noNgqongqoshe wezokuthutha eWestern Cape, u-Isaac Sileku, banxuse abaholi bamatekisi ukuthi bayeke udlame.
USileku uthe kuzothunyelwa abezomthetho ezindaweni ezisengcupheni, waphinde waxwayisa ngokuthi kuzothathwa izinyathelo uma udlame luqhubeka.Umhlangano phakathi kukahulumeni nabamele imboni yamatekisi kulindeleke ukuthi kuwo kutholakale isixazululo.

29/10/2026

KUGWETSHWE ABELISA ABAYISHUMI NGOXHAXHA LWAMACALA OKUBAMBA INKUNZI

INkantolo yesiFunda eThekwini igwebe amadoda ayishumi iminyaka ewu-245 isiyonke, ngamacala okubamba inkunzi amabhizinisi ezindaweni ezahlukene eThekwini phakathi kuka-2017 no-2019.

Abamangalelwa abagwetshiwe nguThabiso Mdletshe, Philani Magongo, Wonder Brilliant Mcwabe, Michael Nxumalo, Khanyisani Thusi, Lindani Ndlovu, Thokozani Mdlalose, Sandile Ngcobo, Sabelo Shandu no-Andile Mchunu.Kuthiwa labelisa babengena ezitolo bezenza abathengi, bese bekhipha izibhamu besabisa onogada nabasebenzi. Bantshonthse imali, omakhalekhukhwini, izingubo nezinye izimpahla.

Amaphoyisa aqala uphenyo ngemuva kokubikwa kwamacala, kwathi abasolwa baboshwa ngo-2019.Ngesikhathi kuqulwa icala, uMshushisi uSurekha Marimuthu ubize ofakazi abangu-27, okubalwa kubo ongoti bezigxivizo zeminwe, abasize ekuxhumaniseni abasolwa namacala.

UMarimuthu ucele inkantolo ukuthi ikhiphe izigwebo eziqinile, wathi amacala ayebucayi futhi ehlelwe kahle, kanti ezinye zezigameko zenzeka emini ngesikhathi izitolo zigcwele abantu.UMdletshe ugwetshwe iminyaka engu-41, uMagongo iminyaka engu-10, uMcwabe engu-31, uNxumalo engu-24, uThusi noNdlovu ngamunye engu-18, uMdlalose engu-30, uNgcobo engu-21, uShandu engu-25 kanti uMchunu ugwetshwe iminyaka engu-27.Izigwebo zihlangene zenza iminyaka ewu-245.

Uphiko lwezokushushisa kwamacala omphakathi iNPA izamukele lezi zigwebo, yathi ubugebengu bokubamba inkunzi bubeka izimpilo zabasebenzi nonogada engcupheni futhi buphinde bube nomthelela emabhizinisini nasemnothweni.

Address

150 Murchison Street, Office No. 4
Ladysmith
3370

Telephone

+27738577713

Website

http://www.uthukelatimes.co.za/

Alerts

Be the first to know and let us send you an email when Uthukela News Times Plus posts news and promotions. Your email address will not be used for any other purpose, and you can unsubscribe at any time.