https://www.facebook.com/288852724312688/

Faneva Tix

Directions

Contact information, map and directions, contact form, opening hours, services, ratings, photos, videos and announcements from Faneva Tix, Grocers, Arivonimamo, Antananarivo.

29/08/2026

AFO

Hialao ny doro tanety, ry namako,
Fa tsy Fotsiny akory na afo mandalo.
Misy aina miafina ao ambanin’ny ravina,
Misy hoavy matory ao anaty voa.

Taona maro no nandrafitra (hazo iray),
Niaritra hain-tany, orana sy rivotra;
Nitsiry moramora, nanandratra rantsana,
Dia indray mipi-maso—lavenona sisa.

Ny ahi-maitso izay nandrakotra ny tany,
No lasa mainty, mangina, mangidy;
Ny vorona nandao ny akany sy ny ala,
Fa ny setroka sisa no miakatra eny an-danitra.

Ry taniko, aza avela ho may ny fonao,
Aza avela ho lavenona ny harenao;
Fa izay dorantsika anio tsy am-piheverana,
Dia mety ho zavatra tsy ho hitan’ny taranaka (intsony.)

Koa raha mahita afo eny an-tanety ianao,
Aza mandalo fotsiny, aza mangina;
Vonoy ny afo, arovy ny aina,
"Fa ny tany tsy lova azontsika dorana—
Fa lova tokony hotehirizintsika ho an’izay mbola ho avy."

Tiafaneva.

27/07/2026

Ny Fahaizana

Ry mpampianatra, valio re ny saiko,
Fa misy fanontaniana mibosesika ato anatiko.
Fa nahoana, arakaraka ny ianarana,
No vao mainka toa tsy hita pesipesenina ny fahalalana?

Rehefa misokatra ny varavaran-tsaina,
Dia hita fa midadasika ny tontolo iainana.
Ny zavatra noheverina ho efa voafehy,
Indro fa lasa poti-drano anaty ranomasimbe.

Tsy mampihena anay anefa izany,
Fa vao mainka mampitombo faniriana hatrany.
Satria ny mahalala dia tsy mirehareha,
Fa mahalala fa mbola maro no tsy voafehy.

Koa avelao izahay hikatsaka fahazavana,
Hianatra amim-panetren-tena sy faharetana.
Fa ny tena hendry, hoy ny fiainana,
Dia ilay manaiky fa tsy misy farany ny fahalalana.

Tiafaneva.

12/07/2026

Nofinofy

Indray alina aho nanonofy,
Nisy hazavana nameno ny fo.
Tonga teto ireo mahay mamorona,
Sy ireo mpanamboatra trakitera marobe.

Tsy nentin'izy ireo teny fotsiny,
Fa nentin'izy ireo ny fahaizana sy ny vahaolana.
Nanomeha saina sy ny teknika,
Hoenti-manova ny hoavin'ny firenena.

Tsy hiandry intsony ny lemaka,
Tsy hihainohaino ny tapitanety midadasika.
Ny tany nangina nandritra ny taona maro,
Dia hifoha hamokatra indray.

Hihodina ny kodiaran'ny trakitera,
Hifangaro amin'ny fofon-tany
Hitsiry ny voa, hitombo ny voly,
Hiverina ho maitso ny tanintsika.

Tsy ho nofy fotsiny anie izany,
Fa ho tanjona iarahan'ny rehetra tratrarina.
Satria rehefa mifanome tanana ny fahalalana sy ny asa,
Dia mitsangana indray i Madagasikara.

Ry tanindrazako malala,
Enga anie ny nofy ho lasa zava-misy.
Ka ny lemaka sy ny havoana rehetra,
Hitondra fiainana, harena ary......

Tiafaneva.

26/06/2026

TTratra ny Asaramanitra

Tratra ny asaramanitra,
Mitsiky ny lanitra manga.
Miramirana ny fo sy saina,
Feno hafaliana sy fanantenana.

Andeha hiara-dia amim-pitiavana,
Hampiely fihavanana sy firaisankina.
Ho tahin'Andriamanitra mandrakariva,
Ary hifaly anie i Madagasikara.

Mirary Asaramanitra sambatra ho antsika rehetra! 🌿✨

TIAFANEVA

23/06/2026

MARARY ANAY NY TANINAY

Marary anay ny taninay,
Marary anay ny mahita azy mihoson-drà am-pahanginana.
Ny hafa miaro ny azy toy ny ainy,
Fa ny anay kosa toa avela ho zakan’ny rivotra sy ny onja.

Marary anay ny taninay,
Rehefa ny kolontsain’ny hafa no asandratra,
Fa ny anay toa ahilika an-jorony,
Ka ny feon-drazana mihamalazo isan’andro.

Tsy mankahala vahiny izahay,
Tsy mandà ny fandrosoana izahay,
Fa maninona no ny antsika no tsy hajaina,
Ao amin’ny tany izay navelan’ny razanay?

Marary anay ny taninay,
Rehefa ny tompony no lasa vahiny ao aminy,
Rehefa ny hasiny no atakalo tombontsoa vetivety,
Ary ny lova sarobidy avela ho very tsy misy mpiaro.

Mitsangana izahay anio,
Tsy hitondra fankahalana, fa hitondra fahatsiarovana.
Fa ny tany tsy amidy ny fanahiny,
Ny kolontsaina tsy vonoina ny hasiny.

"Marary anay ny taninay..."
Ary mbola hiteny izahay raha ilaina,
Fa ny firenena tsy maty raha mbola misy
Olona sahy mitia azy mihoatra ny tombontsoany.

"Marary anay ny taninay,
Fa mbola tianay.
Ary izay no mahatonga anay tsy hangina."

Tiafaneva.

21/06/2026

VIDIM-BARY MIODINA

Toa hoe nidina hono ny vidim-bary,
Izay no re manakoako eny anivon'ny vahoaka;
Vaovao mahafaly sy mampisy fanantenana,
Ho an'ireo tokantrano maro miatrika ny fiainana.

Kanefa eo am-pijerena ny zava-misy andavanandro,
Mbola misy fanontaniana mipetraka mangina;
Fa ireo PPN sy entana tena ilaina,
Toa mbola tsy nahitana fiovana firy amin'ny vidiny.

Ny menaka, ny siramamy ary ny savony,
Mbola anisan'ny fandaniana mavesatra isan'andro;
Ka na dia misy aza ny ezaka hita sy re,
Mbola miandry vokatra tsapa kokoa ny vahoaka.

Tsy ny vary ihany mantsy no mamelona ny tokantrano,
Fa ireo filàna maro miaraka aminy koa;
Koa raha hitohy ny fanatsarana ny tsena,
Dia vao mainka hitombo ny fahatokisan'ny rehetra.

Manantena ny olom-pirenena fa ny fiovana efa natomboka,
Dia hitaratra tsikelikely amin'ny sehatra rehetra;
Mba hahafahan'ny tsirairay mahatsapa marina,
Fa mihatsara tokoa ny fari-piainana andavanandro.

Nidina ny vidim-bary, vaovao mahafaly;
Ny fanantenan'ny vahoaka kosa, ny hahita fiovana mivelatra kokoa amin'ny vidim-piainana.

Tiafaneva.

21/04/2026

Natiora tsy voavidy.

Ny natiora mamelona antsika,
Mitsiry am-pitoniana, tsy mangataka vola.
Rivotra madio, masoandro mamiratra,
Fanomezana tsy hay refesina vola.

Ny rano mikoriana, manome aina,
Ny tany mamokatra, tsy mitaky valiny.
Fa raha simba izy, tsy ho voavidy intsony,
Na dia harena be aza no entinao manolo azy.

Koa tandremo izy, aza atao tsinontsinona,
Fa ny natiora no aina (sy ho avy). 🌿

Ala sy tendrombohitra mijoro ho vavolombelona,
Miaro ny aina, manome fitahiana tsy hita isa.
Ny tany lonaka mamelona isan’andro,
Tsy misy vola hahasolo ny soa omeny antsika.

Raha potehinao izy, hiverina aminao ny vokany,
Hanjary haizina ny mazava, ho ritra ny rano.
Ny ho avy tsy hividianana amin’ny vola,
Fa amin’ny fikajiana ny natiora ankehitriny.

Koa mifoaza ry olona, tandremo ny tontolo,
Aza miandry rahampitso vao hanarina azy.
Fa ny natiora no aina iombonana,
Harena mandrakizay tsy mety ho lany. 🌿

Tiafaneva..

06/02/2026

Fiara électrique, dian’ny hoavy

Tsy setroka, tsy tabataba,
Mandeha mangina eny an-dàlana.
Mitsinjo ny tontolo iainana,
Miaro ny aina, mampihavana.

Herinaratra no hery manosika,
Madio, maharitra, tsy mandoto.
Mihena ny fandaniana,
Mitombo ny tombontsoa ho an’ny olona.

Fitaovana électrique, mpiara-miasa,
Manamora ny asa isan’andro.
Kely fandaniana, lehibe vokatra,
Ho an’ny fiainana tsaratsara kokoa rahampitso.

Tiafaneva.

01/02/2026

**Lafim-pampianarana, Laharana Voalohany**

Aoka ho loharanon-aina ny sekoly sy kilasy,
fahazavana ho an’ny zaza, ho avy tsy miolikolika;
boky sy feon-taratra, saina mivelatra misandratra,
mba hahafahan’i Madagasikara mitsangana tsy mihozongozona.

Ataovy trano mafy ny fototra amin’ny fanabeazana,
mpampianatra hajaina, tohana mazava sy maharitra;
fitaovana feno, latabatra sy penina tsy ritra,
mba hikoriana malalaka ny eritreritra sy ny nofy.

Tsy ho voafetra amin’ny tanàna ihany ny fahalalana,
fa hihantona any an-tsaha, any ambanivohitra,
izay zaza rehetra dia mendrika ho sambatra,
tsy havelantsika ho takona amin’ny haizin’ny tsy fahaizana.

Aoka ny fanavaozana tsy ho teny foana sy sary an-tsaina,
fa ho asa an-kitsim-po: fandaharam-pianarana mifanaraka,
fahaiza-manao sy haitao vao, teny sy asa mifamatotra,
mba hiorim-paka ny fahendrena ao anaty fiainana.

Raisintsika ho laharam-pahamehana voalohany ny fanabeazana,
toy ny jiro eo an-dalana, toy ny rivotra iainana;
raha miorina ny saina, hihatsara ny fiainana,
ary hitsiry eo amin’ny tanindrazana ny hoavy mamiratra.

Tiafaneva.

18/01/2026

N'y teny hoe: "KANTO"
no tiko indrindra tamin'ny nanao MALAGASY..

Address

Arivonimamo
Antananarivo

Website

facebook.com

Alerts

Be the first to know and let us send you an email when Faneva Tix posts news and promotions. Your email address will not be used for any other purpose, and you can unsubscribe at any time.