06/10/2026
🔴 ගෙදර ඉඩක් නැහැ කිය කිය, රසායනික පොහොර ගණන් කිය කිය ලතවෙනවද? 💸 අදම පටන්ගන්න පුළුවන්, පොඩි ඉඩකින් ලොකුම ආදායමක් ගන්න පුළුවන් රහසක් අපි කියන්නම්! 🍄
ඔබත් ඔබේ ගෙවත්තේ හෝ ගෙදර කුඩා ඉඩක ස්වයං රැකියාවක් ලෙස හෝ ව්‍යාපාරයක් ලෙස පටන් ගන්න පුළුවන් ඉතාමත් ලාභදායී වගාවක් තමයි ඔයිස්ටර් බිම්මල් (Oyster Mushroom) වගාව කියන්නේ.
දැනට ලංකාවේ ප්‍රචලිතව වගා කරන බිම්මල් ප්‍රභේද දෙකක් වන ඇමරිකන් ඔයිස්ටර් (සුදු පැහැති) සහ ඇබලෝනි (දුඹුරු පැහැති) කියන වර්ග දෙකම අපේ රටේ ඕනෑම ප්‍රදේශයක දේශගුණයට ඉතාමත් හොඳින් ගැලපෙනවා. මේ වගාවේ තියෙන ලොකුම වාසි වෙන්නේ, කෘෂි රසායනික හෝ පොහොර සඳහා එක සතපහකවත් වියදමක් නොදැරීම, වගා ක්‍රමය ඉතා සරල වීම සහ අමුද්‍රව්‍ය පහසුවෙන් සොයාගත හැකි වීමයි. ඒ වගේම කෙටි කාලයකින්, අවුරුද්ද පුරාම අඛණ්ඩ ආදායමක් ලබාගන්නත් මේ හරහා ඔබට පුළුවන්.
💡 බිම්මල් වගාවට අවශ්‍ය මාධ්‍යය සකසා ගන්නේ කොහොමද?
අද වෙළඳපොලේ පවතින මිල ගණන් එක්ක බැලුවත්, වගා මළු 50 සිට 55 ක් දක්වා ප්‍රමාණයක් සාදාගන්න ඔබට යන්නේ ඉතාමත් සුළු මුදලක්.
☑️ ලී කුඩු කිලෝ ග්‍රෑම් 20ක්: සැහැල්ලු ලී කුඩු 70%ක් සහ අරටුව සහිත ලී කුඩු 30%ක් ලෙස මිශ්‍ර කරගන්න. වියළි ලී කුඩු විය යුතු අතර විශාල ලී කැබලි අහුලා ඉවත් කරන්න. (බොහෝවිට ලී මෝල් වලින් නොමිලේම හෝ රු. 100 - 200 කට ගත හැක).
☑️ හාල් නිවුඩු කිලෝ ග්‍රෑම් 02ක්: සුදු හෝ රතු නිවුඩු භාවිතා කළ හැකි අතර, තම්බන ලද හෝ කැකුළු විය හැකියි. හාල් කැබලි ඉවත් වන ලෙස හලා ගැනීම වැදගත් වේ. (වත්මන් මිල දළ වශයෙන් රු. 160 - 200).
☑️ අළු හුණු ග්‍රෑම් 400ක්: (රු. 50ක් පමණ).
☑️ සමපෝෂ හෝ සෝයා පිටි ග්‍රෑම් 200ක්: (රු. 150 - 250ක් පමණ).
☑️ මැග්නීසියම් සල්ෆේට් ග්‍රෑම් 40ක්: (රු. 100 - 200ක් පමණ).
👉 මිශ්‍රණය සාදාගන්නා ආකාරය:
පළමුව හාල් නිවුඩු, අළුහුණු සහ සමපෝෂ/සෝයා පිටි එකට හොඳින් මිශ්‍ර කර, එම මිශ්‍රණය ලී කුඩු වලට එකතු කර මනාව කලවම් කරන්න. ඉන්පසු මැග්නීසියම් සල්ෆේට් ජලය ස්වල්පයකට දිය කර, ජලය සහිත මල් බාල්දියකට දමා ලී කුඩු මිශ්‍රණයට එක් කරමින් හොඳින් කලවම් කරගන්න. මිශ්‍රණයට ජලය ප්‍රමාණවත් ලෙස එක් වී දැයි බැලීමට මිශ්‍රණයෙන් මිටක් අල්ලට ගෙන ඇඟිලි මිට මොළවා දිග හරින්න. එවිට එය කැබලි 4-5 කට කැඩී යයි නම් ජලය ප්‍රමාණවත්ය.
📦 වගා මළු නිවැරදිව සකස් කිරීම
මේ සඳහා ගේජ් 200 ඝනකම ඇති, අඟල් 7ක් පළල සහ අඟල් 14ක් උස පොලිප්‍රොපිලීන් මළු, අඟල් 3/4 පළල සහ අඟල් 1/2 උස PVC බට කැබලි, රබර් බෑන්ඩ් සහ කෙටි වේස්ට්/පුළුන් අවශ්‍ය වේ. මල්ල තුළට අත යවා අනික් පැත්ත හරවා මල්ලේ මුළු සකස් කර, සාදාගත් මාධ්‍යයෙන් මල්ල පුරවා සුමට ස්ථානයක බිම ගසන්න. නැවතත් මාධ්‍ය එයට එක්කර තරමක් අත මිටින් තද කර මල්ලේ උස අඟල් 8ක් වන සේ හැඩ කරගන්න. පසුව වගා මල්ලේ කෙළවරට PVC මුදුව ඇතුල් කර, පසුව ඇතිවන සිදුරට කෙටි වේස්ට් හෝ පුළුන් ඇබයක් ගසා, ඇබය නොතෙමෙන ආකාරයට පොලිතීනය නවා රබර් මුදුව ආධාරයෙන් රඳවන්න.
🔥 වගා මළු ජීවානුහරණය කිරීම (Sterilization) සහ ලිප සැකසීම
පියනේ කුඩා සිදුරක් සහිත හිස් ග්‍රීස්, ඩීසල් හෝ ග්ලූකෝස් බැරලයක් ගෙන, අඟල් 5 1/2ක් පමණ උසට ජලය දමා, බැරලය තුළ දැල් ආධාරකයක් තබන්න. මේ සඳහා ගඩොල් කැට 70ක්, අළු, මැටි, වැලි සහ අමු ගොම තාච්චි යොදාගෙන අඩි 2ක් පමණ (අඟල් 22) උස ලිපක් බැඳගත හැකියි. ගඩොල් වරි 3ක් බැඳ කම්බි වළලු 1ක් තබා, නැවත වරි දෙකක් බැඳ ඉතිරි කම්බි රවුම තබා ලිප ශක්තිමත්ව සාදා, අවසානයේ බැරලය තැබීමට ගඩොල් කැට 4ක් අඟල් 1 1/2ක් ඉහළින් සිටින පරිදි තබන්න. බැරලය තුළ වගා මළු අසුරා, ඉන්ධන පිරිමැසුම් ලිපක් භාවිතයෙන් බැරලයේ පියනේ සිදුරෙන් හුමාලය පිටවූ මොහොතේ සිට පැය 2 සිට 2 1/2ක කාලයක් ඒකාකාරී උෂ්ණත්වයක් ලබා දෙමින් මළු ජීවානුහරණය කරන්න.
🌱 බීජ යෙදීමේ නිවැරදි ක්‍රමවේදය (Inoculation)
නිරෝගී බිම්මල් බීජ පැකට් එකකින් (අද මිල රු. 200 - 250ක් පමණ) වගා මළු 50-55කටම බීජ යෙදිය හැක! බීජ යෙදීම සඳහා බීජෞෂණ කාමරයක් තුළ තැබූ මේසයක් භාවිතා කිරීම වඩාත් යෝග්‍යයි. වී ඇට එකිනෙක වෙන්වන පරිදි බීජ බෑගය පොඩි කරගන්න. නාස් ආවරණයක් පැළඳ, මේසය විෂබීජ නාශකයකින් පිරිසිදු කර, ඉටිපන්දම් 4ක් දල්වා වර්ග අඩි 1-1 1/2 ක පමණ කොටුවක් සාදාගන්න. ඒ මැද නිවුණු ජීවානුහරිත වගා මල්ල තබා, එහි කට විවෘත කර බීජ ඇට 25-30ක් දමා, නැවත පුළුන් ඇබය ගසා, අඟල් 4x4 පත්තර කැබැල්ලකින් එය වසා රබර් මුදුවකින් PVC බටයේ රඳවා ගන්න.
🌒 දිලීර වර්ධනය කර ගැනීම (Incubation)
බීජෞෂණ කාමරය තුළ 75%ක අඳුරක් පැවතිය යුතු අතර උෂ්ණත්වය සෙල්සියස් අංශක 26-28 ක් විය යුතුය. ඇමරිකන් ඔයිස්ටර් සඳහා දින 25-30 ක් ද, ඇබලෝනි සඳහා දින 40-45 ක් ද දිලීර වර්ධනයට ගත වේ. වර්ධන කාලය තුළ ආසාදිත වගා මළු නිරීක්ෂණය කර ආරක්ෂාකාරීව විනාශ කරන්න.
🏡 මල් පිපීම සඳහා වන වගා ගෘහය සැකසීම
දිලීර වර්ධනය සම්පූර්ණ වූ පසු, මල් පිපීම සඳහා 26°C-28°C උෂ්ණත්වයක්, 85% ආර්ද්‍රතාවයක්, 50% ආලෝකයක් සහ මනා වාතාශ්‍රයක් සහිත වගා ගෘහයක් අවශ්‍යයි. වහලයට උළු සෙවිලි කිරීම, ගෘහයේ උස අඩි 13කට වැඩි වීම සහ බිමට සිමෙන්ති දැමීම වඩාත් යෝග්‍යයි. බිත්තිය අඩි 2 - 2 1/2 ක් උසට බැඳ සුමටව කපරාදු කර, ඉතිරි කොටස අඟලට කොටු 30-40 ඇති කෘමි ප්‍රතිරෝධී දැලකින් ආවරණය කර, වහලයට පහළින් එම දැලෙන්ම සිවිලිමක් ගසා ගන්න. දොර පිටතට විවෘත විය යුතු අතර කෘමීන් ඇතුල්වීම වැළැක්වීමට ඇතුළතින්ද ආවරණ දැලක් යෙදීම සුදුසුයි.
මෙහි අඟල් 2x2 ලී වලින් සාදාගත් 'A' හැඩැති රාක්ක (අඩි 4ක පරතරයක් සහ අඩි 2ක පළලක් ඇති) මත, අඟල් 6ක පළල තට්ටු සාදාගන්න. දිලීර වැඩී සම්පූර්ණ වූ මළුවල කට විවෘත කර, 'W' හැඩයට කාමරය තුළ තැබූ 'A' හැඩති රාක්ක මත තිරස් අතට තබන්න. තෙතමනය ආරක්ෂා වන පරිදි අවශ්‍යතාවය මත අත් ඉසිනයකින් මීදුමක් ලෙස වගා මළු මුහුණතට ජලය ඉසින්න. උෂ්ණත්වය වැඩි අවස්ථාවල බිමට වතුර දමා පාලනය කරගත හැකියි.
✂️ අස්වැන්න නෙලීම හා ආදායම ලබා ගැනීම
වගා මළු විවෘත කර දින 7-10 න් කුඩා මල් කැකුළු දැකිය හැකි අතර, ඉන් දින 3 කින් අස්වනු නෙළිය හැක. පිරිසිදු භාජන දෙකක් ගෙන, නාස් ආවරණයක් පැළඳ, හැකිතාක් උදේම රාක්කයේ පහළ සිට ඉහළට අස්වනු නෙළන්න. පොකුර පිටින්ම කැඩිය යුතු අතර, ලී කුඩු තැවරුණු කොටස කපා එක් භාජනයකට ද, පිරිසිදු බිම්මල් අනෙක් භාජනයට ද දමන්න. නැවතත් දින 7-10 න් අස්වනු නෙළිය හැකි අතර, මාස 2 සිට 2 1/2 ක් යනතුරු එක මල්ලකින් අස්වැන්න නෙළාගත හැකියි!
අද වන විට ඔයිස්ටර් බිම්මල් ග්‍රෑම් 200ක පැකට්ටුවක් වෙළඳපොලේ රුපියල් 150 - 200 ත් අතර ඉහළ මිලකට අලෙවි වේ. අඟල් 7 හෝ 9 පළල සිදුරු රහිත පොලිතීන් මළුවල ඇසිරීමෙන් සාමාන්‍ය උෂ්ණත්වයේ දින 4ක් ද, සිදුරු සහිත මළුවල ශීතකරණයක දින 4ක් ද අස්වැන්න කල්තබා ගත හැකියි.
💡 පර්යේෂණ තොරතුරු: අස්වැන්න දෙගුණ කරන විශේෂ රහස් දෙකක්
• මාධ්‍ය පිළියෙල කිරීමේදී මාධ්‍ය කිලෝ ග්‍රෑම් 20 ට ජිප්සම් (CaSO4) ග්‍රෑම් 400ක් එක්කිරීමෙන් අස්වැන්න සැලකිය යුතු ලෙස වැඩිකර ගත හැකියි.
• 2% යූරියා ද්‍රාවණයක් අස්වනු නෙළන වගා මළුවලට සතියකට එක් වරක් යෙදීමෙන්ද අස්වනු වැඩිකර ගත හැක.
📞 උසස් ප්‍රමිතියේ බිම්මල් බීජ රාජ්‍ය ආයතන වලින් ලබාගන්න:
කුණ්ඩසාලේ බීජ හා රෝපණ අංශය - 081 2420471
ගන්නෝරුව අලෙවි පියස - 081 3845285
තෙලිජ්ජවිල - 041 2240464
මාකඳුර - 031 2299625
පොතුහැර - 037 2237800
රත්මලාන අපනයන මණ්ඩලය - 011 2725471
හැමදාම අනුන්ගේ දේවල් දිහා බලලා සුසුම් හෙළනවාට වඩා අදම ගෙදර ඉතිරි වෙලා තියෙන පුංචි ඉඩෙන් වැඩක් පටන්ගන්න. නිෂ්පාදනය කිරීම ඔබ බාරගන්න, අලෙවිය අපි බලාගන්නම්!
