21/03/2026
नाशिकमध्ये अंकशास्त्राच्या नावाखाली लोकांना भुलवणारा कथित ‘कॅप्टन’ अशोक खरात याला बलात्काराच्या गंभीर आरोपांप्रकरणी नाशिक पोलिसांनी अटक केली आहे. या घटनेमुळे राज्यात मोठा राजकीय वाद निर्माण झाला आहे.
पोलिसांच्या माहितीनुसार, 27 वर्षीय महिलेच्या तक्रारीवरून आरोपीविरुद्ध गुन्हा दाखल करण्यात आला आहे. वैवाहिक अडचणी सोडवण्याचे आमिष दाखवत 2022 ते 2025 दरम्यान तिच्यावर वारंवार अत्याचार केल्याचा आरोप आहे.
या प्रकरणात आरोपीकडून काही अश्लील व्हिडिओ जप्त करण्यात आले असून त्यांची चौकशी सुरू आहे. तसेच आणखी पीडित आहेत का, याचाही तपास सुरू आहे.
दरम्यान, काही राजकीय नेत्यांचे आरोपीसोबतचे फोटो आणि व्हिडिओ समोर आल्याने प्रकरणाला राजकीय रंग चढला आहे. विरोधकांनी सरकारवर जोरदार टीका केली आहे.
राज्याचे गृह राज्यमंत्री योगेश कदम यांनी निष्पक्ष चौकशीचे आश्वासन दिले असून दोषींवर कडक कारवाई केली जाईल, असे सांगितले आहे.
सध्या आरोपीला अटक करण्यात आली असून पुढील तपास नाशिक पोलिसांकडून सुरू आहे. या घटनेमुळे महिलांच्या सुरक्षेचा मुद्दा पुन्हा ऐरणीवर आला आहे.
Super Maharashtra news Sandip Shahane
