19/06/2026
端午節除咗食粽同扒龍舟，其實仲係一個好重要嘅養生節氣‼️因為呢段時間天氣開始又熱又濕（即係所謂嘅「毒月」），個人好容易覺得攰、冇胃口，甚至皮膚敏感。
💡 端午養生 3 大重點
1.清熱袪濕： 天氣又濕又悶熱，最緊要幫身體「抽濕」💦，如果唔係好易個人重甸甸、冇精神。
2.照顧脾胃：粽好食但糯米好難消化，食得太多條腸胃會「頂住」，所以飲食要清淡番少少。
3.防蚊防蟲：呢個時候蚊蟲最活躍，古人會掛艾草，我哋而家可以用艾草包或者天然防蚊液。
🥣 2 款超簡單端午養生湯水
呢兩款湯做法超簡單，滾湯或者煲一個零鐘就飲得，啱晒消暑袪濕🥰
1. 老冬瓜荷蓮鴨腎湯（消暑清熱）
功效：清熱解暑、去心火，最啱大熱天時飲。
材料：老冬瓜（連皮洗乾淨切舊）、鮮荷葉 1 塊、蓮子、百合、乾鴨腎 2 個、瘦肉適量。
做法：
1. 瘦肉同鴨腎飛水。
2. 煮滾水，將所有材料放晒落去。
3. 大火煲滾後轉慢火煲 1小時。
2. 赤小豆粉葛鯪魚湯（去濕消滯）
功效：去濕去骨火、去疲勞，仲可以幫手消埋食完粽嘅滯。
材料：粉葛 1 個（去皮切舊）、赤小豆及扁豆各一揸、鯪魚 1 條、陳皮 1 角、生薑 2 片。
做法：
1. 鯪魚洗淨抹乾，用薑片下鑊煎到兩面金黃，放入煲湯袋。
2. 另外燒滾一煲水，放晒粉葛、赤小豆、扁豆同陳皮。
3. 將成袋鯪魚放埋入去，大火煲滾轉小火煲 1.5 小時，落鹽即成。
💡 小貼士：食粽嘅時候，記得配杯熱普洱茶或者酸梅湯，包你冇咁易滯😉
