21/09/2026
ሳምንታዊ መልዕክመሻት፣
የመጀመሪያው እና ትልቁ ልማት ሰላም ነው!
ሰላም ጦርነት በመቆሙ ብቻ የሚረጋገጥ ሁኔታ አይደለም። እውነተኛና ዘላቂ ሰላም የሚገነባው ሰዎች በክብር ሲኖሩ፣ ልዩነቶች በግጭት ሳይሆን በውይይት ሲታዩ፣ ፍትሕና እርቅ ለማህበረሰቡ መሠረት ሲሆኑ ነው።
በብልፅግና ፓርቲ የሚመራው የመደመር መንግስት ለዘላቂ እና አዎንታዊ ሰላም ግንባታ ፅኑ አቋም አለው። ይህ አቋማችን በንግግር ብቻ የሚገለፅ ሳይሆን፤ በዕለት ተዕለት ተግባራችን፣ በምንመርጣቸው ቃላት እና ለወደፊት ትውልድ በምናስቀምጠው መሰረት የሚመዘን ነው።
በሀገራችን የሰላም ጉዳይን ከፖለቲካዊ ውይይት፣ ከብሔራዊ መግባባትና ከልማት ጋር ማያያዝ አስፈላጊ ነው። የመደመር ፍልስፍናም በኢትዮጵያ እውነታ ላይ የተመሠረተ ፖለቲካዊ አስተሳሰብን፣ የተነጣጠሉ አቅሞችን በመደመር የጋራ አቅም መፍጠርን እና ለጋራ እጣ ፈንታ በትብብር መሥራትን ያበረታታል።
በመደመር የቀረበው አንድ ጠንካራ ሀሳብ “የመጀመሪያው እና ትልቁ ልማት ሰላም ነው” የሚለው ነው። ይህ አተያይ ሰላምን እንደ የልማት ውጤት ብቻ ሳይሆን፣ ልማት የሚቻልበት መሠረታዊ ሁኔታ እንደሆነ ያቀርበዋል።
ሰላምን በሰላማዊ መንገድ ለማምጣት በብልፅግና ፓርቲ የሚመራው የመደመር መንግስት በኢትዮጵያ ታሪክ ለመጀመሪያ ጊዜ ሀገራዊ ምክክር ኮሚሽን በማደራጀት ልዩነቶችን በውይይት ለመፍታት የተለያዩ የማህበረሰብ ክፍሎችን የወከሉ ተሳታፊዎች በጠረጴዛ ዙሪያ የሚነጋገሩበትን እድል ፈጥሯል።
ዘላቂ ሰላም ለመገንባት የጦር መሣሪያ መጠቀም ብቻ መፍትሔ አይሆንም። የተፈጠሩ ልዩነቶችን ለመፍታት ውይይት፣ ምክክር፣ መደማመጥ ፣ እርቅ እና የጋራ መግባባት ያስፈልጋሉ። የተለያዩ አስተሳሰቦች መኖራቸው በራሱ ችግር አይደለም፤ ዋናው ጉዳይ ልዩነቶችን ወደ ግጭት ሳይሆን ወደ ውይይት የሚወስድ የፖለቲካ ባህል መገንባት ነው።
ይህም የብሔራዊ ምክክር ሂደት ዋና የፖለቲካ ጥያቄ እንዲሆን ያደርገዋል። የተለያዩ የማህበረሰብና የፖለቲካ አካላት በአንድ ጠረጴዛ ላይ ተቀምጠው ልዩነቶቻቸውን በሰላማዊ ውይይት ማስተናገድ ሲችሉ፣ የፖለቲካ ምህዳር ከግጭት ወደ ሀሳብ ውድድር ይሸጋገራል። በዚህ አተያይ፣ ሰላም የአንድ ተቋም፣ የአንድ ፓርቲ ወይም የአንድ ቡድን ብቻ ኃላፊነት ሳይሆን የሁሉም ዜጎችና ባለድርሻዎች የጋራ ኃላፊነት ነው።
የዛሬ የሰላም ምርጫ የነገውን ትውልድ ዕጣ ፈንታ ይወስናል። ልዩነትን እንደ ጠላትነት ከማየት ይልቅ እንደ ውይይት እድል ማየት፤ ግጭትን በኃይል ከማስቀጠል ይልቅ በምክክር መፍታት፤ እና የተከፋፈሉ አቅሞችን ወደ የጋራ ዓላማ ማሰባሰብ የዘላቂ ሰላም መሠረቶች ናቸው።
በመሆኑም ሁሉም ባለድርሻ አካላት የህዝብን መሻት የመንግስትንም ቁርጠኝነት በመገንዘብ ሀገራችን ሁለንተናዊ ብልፅግና ለማረጋገጥ እያስመዘገበች ያለችው ስኬቶች ቀጣይነት እንዲኖራቸውና ሰላሟም እንዲፀና መስራት ይጠበቅባቸዋል።
ብልፅግና ፓርቲ
11/1/2019 ዓ.ም
አዲስ አበባ
