13/06/2024
Dogoggorarraa barachuun qajeelina!
Biyya keenyatti dhimmi tokko erga darbee booda komiin heddummata. Taateen wayii osoo hin raawwatin dura dogoggoroota uumamuu malan dursa tilmaamuun wal gorsanii wal sirreessuun amala baramaa miti. Yoo dursitee waa dubbattes, "lafa jala maaf wacca?" jedhamta, malee ija gaarummaan namni ilaalu muraasa. Rakkoo/dogoggora uumamu tokko dursanii tilmaamuun gaaga'ama dhufu jalaa wal oolchuu osoo amaleeffannee gaarii natti fakkaata.
"Waa malee manni hin aaru" jedha Oromoon gaafa mammaaku. Anis waa malee miti kanan barreeffama kana katabeef. "Gamni kan darberraa barata" jedhu mitiiree? Bara darbe saantaan 'Hachalu Hundessa Award' waa hedduu nu agarsiise. Waa hedduus nu taajjabsiise. Taajjabbichi maali? Maaltummoo godhamuu qaba?
Innis maal seetani? Badhaasni Haacaaluu Hundeessaa badhaasota kaanirraa waan adda isa godhu qaba. Badhaasa qofa osoo hin taane, yaadannoo waggaa waggaatis. Haacaaluun erga qaamaan nurraa adda bahee reefu waggaa 4(afur) guutuuf deema. Akkuma Etika Teferi "Sobnee sirbina keessi keenya madaa; Ijji imimmaan mormaan ragadaa" jedhe sana, gaddi Hacee uummata keenya keessaa hin baane. Yeroo waa'een Hacee ka'u, yeroo hunda ijji nu imimmaana'a. Garaa keenyatu gubata! (Ani gama koon yeroon Hacuu yaadadhu, imimmaan akka Asiidii nama gubu/dhangaggaa'utu keessa kootii madda.)
Kanaafuu, Award'chi sagantaa bashannanaa miti. Yaadannoodha!
Bara darbe garuu, waa hedduu argine. Mooraa sagantichi itti qophaa'e keessatti haalli ture sagantaa agarsiisa faashinii fakkaata ture. Uffannaan namoota muraasaa yaadannoo Hacee kan madaalu hin turre. Bakka 'night club'tiifuu ni saalfachiisa.
Kaan immoo sagantaa cidhaa fakkaata. Dhiiraa dubaraan wanti agarsiifamaa ture madaala hin kaasu.
Gama biraan immoo kan hedduu nama gaddisiisu, namoonni baay'een sagantaan booda garee gareen wal gurmeessanii mana ciffaraa/night club bulani. Wuskii, Gordon fi Shaampaayinii facaasaa bulan. "Gaddinee homtuu hin dhufu" kan jedhe fa'aatu ture. Ayii!
"Re'ee