20/09/2026
እነ አያጅቦ........
የጥቅም ጥምረቱ የጅብ አካሄዱን ጀምሯል፣ ጅብ አብሮ የሚጓዘው የሚበላ እስኪገኝ ብቻ ነው
ዛሬ በሻዕቢያና በግብፅ ድጋፍ ተደግፈው በሕይወት ለመቆም የሚዳክሩት የታጠቁ ቡድኖች ስብስብ፣ የሀገርና የሕዝብ ፍላጎት ያስተሳሰረው ሳይሆን የህልውና ኪሳራ የወለደው የጥቅም ጥምረት ነው። በተለያየ ጊዜ አውዳሚ ተግባራትን ሲፈጽሙ የቆዩት እነዚህ ኃይሎች፣ አቅማቸው ሲደክም የውጭ ጠላቶችን እጅ በመያዝ የኢትዮጵያን ሰላም ለማደፍረስ መጠቃቀማቸው አዲስ ነገር አይደለም። ነገር ግን የቱንም ያህል በውጭ እርዳታና ማበረታቻ ለመንቀሳቀስ ቢሞክሩ፣ ከጀርባቸው ያለው ዋናው ማንነት እርስ በእርስ የመጠራጠርና አጋጣሚን ጠብቆ የመጠላለፍ "የጅብ አካሄድ" በመሆኑ ወደ ተሻለ ውጤት ሊያደርሳቸው አይችልም።
የጅብ አካሄድ የሚባለው ተፈጥሯዊ ባህሪው የሚያሳየው አብሮ የመሄድ ግን በፍጹም አለመተማመንን ነው። ጅቦች በቡድን ቢንቀሳቀሱም ቅንጣት ታህል እምነት የላቸውም፤ አንዱ ሌላውን ቀድሞ ለመብላት፣ ደካማ ሆኖ ሲያገኘው ለመቦጨቅና እድሉን ሲያገኝ ለመጠላለፍ ይዘጋጃል። እነዚህ የታጠቁ ቡድኖችም በታሪክ፣ በፖለቲካ መስመርና በዓላማ ተቃራኒ እንደመሆናቸው መጠን፣ ዛሬ በጠላት እርዳታ አንድ ላይ ቢሰበሰቡም አንዳቸው ሌላውን በጥርጣሬና በስጋት ነው የሚያዩት። አጋጣሚውን ያገኘው አካል ሌላኛውን ለመዋጥ በሚጠባበቅበት እንዲህ ባለው አደገኛ አካሄድ የተገነባ ስብስብ ደግሞ፣ የሕዝብንና የመንግሥትን የፀና የሰላም ጉዞ ለአንዲት ሴኮንድ እንኳ ሊያወላውል አይችልም።
በመሆኑም በውጭ ኃይላት ጥጋብና ድጋፍ የተቋቋመው ይህ የጥቅም ጥምረት፣ ጊዜያዊ መጠቃቀም እንጂ ዘላቂ አንድነት ሊኖረው አይችልም። የኢትዮጵያ ሕዝብ ከጥፋትና ከትርምስ ይልቅ ሰላምንና እድገትን መርጦ በተረጋጋ መንገድ እየተጓዘ ባለበት ወቅት፣ በጅብ አካሄድ ተሰባስበው ሀገር ለማፍረስ የሚሞክሩት እነዚህ ኃይሎች መጨረሻቸው በገዛ እጃቸውና በራሳቸው እርስ በእርስ መጠራጠር የመበታተን ውድቀት ብቻ ይሆናል።
