17/10/2025
كتير من الناس بيتفاجئوا إن الشخص اللي بيعاني من السمنة ووزن زائد ممكن يكون عنده أنيميا😯
الحقيقة إن السمنة نفسها ممكن تكون سبب رئيسي لفقر الدم والسر كله مربوط ببروتين اسمه الهيبسيدين
إيه هو الهيبسيدين؟👇
الهيبسيدين هو ببتيد هرموني بينتج في الكبد ووظيفته الأساسية تنظيم الحديد في الجسم عن طريق
1. امتصاص الحديد من الأمعاء: لما يكون الهيبسيدين عالي بيغلق بروتين ناقل الحديد (فيروبوريتين) على خلايا الأمعاء وبالتالي الحديد اللي بناخده من الأكل مش بيدخل الدم
2. توزيع الحديد في الجسم: الحديد المخزن في الكبد والطحال كمان مش بيتحرر فيبقى مخزن وما بيستخدمش لتكوين الهيموغلوبين
3. الاستجابة للالتهابات: أثناء الالتهابات أو العدوى الهيبسيدين بيزيد عشان يمنع البكتيريا من استخدام الحديد وده جزء من آلية الدفاع المناعي
السمنة = التهابات مزمنة منخفضة الدرجة
الدهون في الجسم مش بس تخزن الطاقة كمان بتفرز مواد التهابية مثل IL-6 وTNF-α المواد دي ترفع الهيبسيدين حتى لو مفيش عدوى فعلية
و النتيجة الحديد مش بيمتص كويس والدم بيبقى فقير بالهيموغلوبين وبالتالي ظهور الأنيميا رغم الأكل الكافي
اللي غالبا بتكون فقر الدم الالتهابي (Anemia of Inflammation/Chronic Disease)
الحديد بيبقى مخزن (Ferritin عالي أو طبيعي)لكن الجسم مش قادر يستخدمه لتكوين الهيموغلوبين بشكل فعال
👈علشان كده أول حاجة بنكسبها من النظام الغذائي الصحي وخفض الوزن هي تقليل الالتهابات في الجسم وبالتالي
التغيير في النظام الغذائي وخفض الوزن مش بس بيقلل
الدهون لكنه كمان حل فعال لفقر الدم
ده بيساعد الجسم على استخدام الحديد المخزن بشكل أفضل وتحسين الهيموغلوبين تدريجيًا
ومننساش دور ممارسة الرياضة المعتدلة وتناول أطعمة غنية بمضادات الالتهاب (خضار ملونة، أسماك دهنية، مكسرات) بيكون له تأثير إيجابي على تقليل الهيبسيدين
🍀 في May's Healthy steps هنساعدك تحقق أهدافك
عن طريق نظام غذائي صحي ومشبع 💪
