Healthy Home by walaa

28/05/2026

شعب مالوش كتالوج😂😂

لما "الفهلوة المصرية" تكسب التكنولوجيا و السيستم الواقع 💡😂
••
مشهد عبقرى و مضحك وفى نفس الوقت يوجع القلب من كتر ما هو واقعى! شعب ملوش حل فى "تسيير الأعمال" و خلق البدائل.
••
المشهد دا كان محتاج مخرج سينمائى يصوره
اللى حصل قدام ماكينة الـ ATM، الزحمة مغرقة الشارع، و الماكينة كالعادة يا إما "عطل فنى" يا إما "خارج الخدمة"، و الناس واقفة على أعصابها اللى عايز يقبض واللى عايز يحول.
و فجأة.. ومن قلب المعاناة، يظهر "النظام البنكى الموازي"!
عم حسن
••
واحد ساب الطابور و وقف زى المنادى:
"يا جماعة.. مين واقف هنا عايز يعمل إيداع كاش؟"
يرد عليه كام واحد
فقال لهم: "تعالوا كده ع الجنب اليمين!"
••
و سأل الباقين: "مين منكم عاوز يسحب كاش و عنده إنستاباى أو محفظه؟"
فرد مجموعه من الناس إحنا
فقال لهم تعالوا ع الشمال
••
و جاب ترابيزه صغيره و قعد
هات يا أستاذ الكاش فى إيدى، وأنا هحولهم لسيادتك حالاّ على إنستا باى (InstaPay) و أنا واقف.. و بكده أنا سحبت كاش من غير ماكينة، وأنت عملت إيداع من غير ما تدخل البنك.. يلا اللى بعده يتفضل!
و هكذا بقى معاه مبلغ كبير كاش
••
راح الناحيه التانيه و سأل: "حضرتك عاوز كاش ؟"
عندك إنستا ؟
حول لى ع المحفظه و خد الكاش
••
فى دقيقة واحدة، الطابور اتحول لـ "مَقصّة بنكية بشرية"، و الناس بدأت تبدل الفلوس مع بعضها بـ "إنستا باى" و الكاش يلف و يرجع لصاحبه، و ماكينة البنك واقفة فى النص زى زهرية الورد ملهاش أى تلاتين لزمة!
••
و الشغلانه عجبت كام واحد تانى كل واحد خد سوية عملاء و وقف بيهم على جنب للتنفيذ
••
الشعب دا لو اتحط في ظروف صعبة أكتر من كده، و النبى لا يخترع عملة رقمية خاصة بيه و يسميها "فكّيهه".
و لو التكنولوجيا ها تقع، و السيستم يقع، الماكينات تبوظ .. لكن المصرى دايماً عنده "خطة ب" فى جيبه!

27/05/2026

مقارنة سريعة 🥰
الفتة بتتاكل بالصلصة ولا بالخل والثوم

22/05/2026

سؤال محيرني معلش تحملوني
كنت علي صفحه حد منزل اكل بيض وجبنه وبطيخ وده بالمناسبه اكله صيفي من ايام اجدادنا
وفي الاسكرين جزء من تعليقات من كميه تعليقات مليانه بشتيمه وقله ادب اول مره اشوفها
السؤال بقي
لماذا خلق الله كل هذه النعم علي الارض
متاعا لكم ولانعامكم صح كده
طيب في الاصل ربنا خلق الانعام ليه
خلق الله الأنعام (الإبل، البقر، الغنم، والماعز) تسخيرًا للإنسان ليستعين بها
طيب بالمنطق كل هذه النعم من خضار وفاكهه اتخلقت للانعام وانا الانسان لا
يعني الانعام احسن من الانسان ازاي طيب
يعني الانعام تاكل مانجو بانواعها الكتير وبرتقال بأنواعه الثلاثه ويوسفي وشمام وكانتلوب وكيوي
وباقي الفواكه الكتير وانا اكل ٤ انواع والباقي ده ديكور وزينه
وكذلك الخضروات كل ده اتخلق للحيوان انا مسموح ليا صنف او صنفين
افلا تعقلون

14/05/2026

إذا لم يعجبك تفكيري وأسلوبي فأنا لا أذكر أني أستيقظ في كل يوم بهدف أن أثير إعجابك 😌👌

12/05/2026

خلينا متفقين ان الموضوع في الاخر هيقلب بيزنس وبيزنس عالي كمان ليييه بقي عشان احنا شعب عاطفي بطبعه وبنتعاطف مع اي حد دخل نفسه في نظريه المؤامرة انا معنديش ادني مشكله حاليا اللي عايز يقطع الاكل براحته واللي مش عايز ياخد العلاج براحته حياته هو حر فيها يخف يتعب ليه هو لكن حبيت احذر من حاجه ان اغلب اللي متبعين النظام من المشهورين وعندهم اعداد بالملايين هيبدئو يدخلو بيزنس في الموضوع ويلعبو علي العاطفه والخلفيه الموجوده مع النظام ويدخلو البيزنس بتاعهم
لما دخلت علقت وقولتلها الموضوع بقي بيزنس طيبات ومكملات والمعلومه اللي اعرفها من متبعي النظام انه ضد اي علاج علي كلامهم هما مش كلامي عملتلي بلوك وحذفت التعليق
انا مش مع نظام الطيبات انا مع نظام اللي بتعب منه اوقفه فورا ومكملش فيه لان عندي قناعه اني انا طبيب نفسي وانا دلوقت مش بناقش صحه النظام او عدم صحته انتم حريين
بس حبيت اقول ان سهل يضحك علي الناس خصوصا لما يكون الموضوع ليه خلفيه تعاطف واللي بيكتب المفروض انها حد ثقه بالنسبه للبعض في المجال الصحي وصفحتها معروفه بالاكل الصحي
وقفتوا ادويه تمام ربنا يسترها
بس بلاش اي علاج تاني بقي ولا تحت مسمي مكمل ولا غيره
دمتم سالمين

11/05/2026

طول ما رف التوست الاسمر فاضي
الرايس كيك بأمان لن يفهمها غير محبي الرايس😂😊

11/05/2026

جماعه هو الفيس اتملي كحك وبسكويت وبيتفور ليييه مش ده عيد لحمه 😅😊

10/05/2026

🔴 هيجرى ايه يعنى لو اكلتلك شويه من دا👇 اد كبشة ايد كدا كل يوم؟! 🤔
هتتخن؟! 🙄
لا والله ما هتتخن
بس هيديك شوية فوايد كدا انت بتروح تدور عليها برا و تدفع فيها دم قلبك
ابسط شئ
✅️ هو غنى بالماغنسيوم اللى الناس هوسانا بيه و انهى نوع ماغنسيوم احسن يا دكتور... موجود اهه فى كبشة لب ب ٥ جنيه
✅️ غنى بالدهون الصحيه المشبعه و الالياف اللى بتساعد على على تقليل اكوليسترول و الدهون الضاره LDL
✅️ و بالتالى هتحافظ على صحة القلب و الشرايين
✅️ غنة بالماغنسيوم و التربتوفان و دول بيساعدو على تهدئة الاعصاب دا غير انهم بيساعدو فى افراز هرمون السعاده 😍😍
✅️ الماغنسيوم برضو مفيد لصحة العظام و بيمنع هشاشة العظام
✅️ غنى بالفوليك اسيد المفيد للحمل
✅️ بص بقا القنبله دى.....
غنى بفيتامين " ه" اللى هو فيتامين E
و دا بقا مهم جداااا لصحة الشعر و الجلد و الضوافر... اللى بتروحو تشتروه بالغالى دا
✅️ عشان غنى بالالياف فهو بيساعد جداااا فى عملية الهضم و تليين الامساك
🔴 بيتخن يا دكتور؟؟!!
اه بيتخن لو اكلت كل يوم ربع كيلو مثلا 🙄... احنا بنقول شوية اد كبشة الايد تكفى
بس عارف ايه اللى بيتخن بجد؟؟!🤔
- انك تاكل وجبه او وجبتين بس فى اليوم ❌️❌️❌️
- انك متاكلش خضار مع الوجبات ❌️❌️❌️
- انك تفضل تنقنق وسط الوجبات طول اليوم و تقولى " اصل انا مباكلش كميات"و ترفعلى الانسولين على مدار اليوم ❌️❌️❌️
- انك مبتنامش كويس ❌️❌️❌️
- بتاكل عيش🥖 و رز🍚 و مقليات 🍟 كتير ❌️❌️❌️
نظم الكام نقطه دول ☝️ و خدلك كبشة لب سورى او عباد او اسمر (على حسب ما انت بتسميه فى بلدك) كوجبه اسناك... و انت هتخس و هتبقا صحتك بومب
بس اختار اللبايه الكبيره مش الصغيره 😏
متنساش بس توعى غيرك 😒
🔴 و متنساش
لو حابب تحجز و تتابع معايا على الواتس تغذيه سليمه و انقاص وزن او متابعه بعد عمليات التكميم
ابعت على رسايل الصفحه او الواتساب (الرقم اول الصفحه فوق 👆) كلمة " جزر🥕" و هتوصلك تفاصيل الاشتراك علطول 🙂
كان معكم من قلب الصيدليه و علب الحقن و اللبوسات صيدلى و بتاع تغذيه لحد ما يجيبو حد بتاع تغذيه 😏



✋️😎

08/05/2026

نقول تاني عشان الناس تفهم المقصود 😊 ومش هكتب في الموضوع تاني بس حقيقي لاني ناس كتير سألتني وخايفه
كل واحد ياكل الأكل اللي يناسب جسمه وحالته الصحية، لأن فيه أكلات ممكن تريح شخص وتتعب شخص تاني.
لكن أي حد بياخد علاج سكر أو ضغط أو أي علاج مزمن ما يوقفوش أو يغير جرعته إلا مع الدكتور المتابع لحالته، ولو حصل تحسن فالدكتور هو اللي يقرر يقلل الجرعات تدريجيًا.
طبيعي ناس كتير ترتاح لما تقلل الدقيق الأبيض أو الأكل الدسم ايه الانبهار في كده
وطبيعي مريض القولون أو المعدة يرتاح لما يمنع أكلات معينة بتتعبه معقول فجأه حضرتك اكتشفت ان الفول والطعميه وحشين ودكتور الباطنه بتاعك قال بلاش تاكلهم من زمان😂
الفكرة إن كل جسم له ظروفه، ومش معنى إن أكلة نفعت شخص تبقى مناسبة لكل الناس والعكس
وبرضه مش منطقي نحرم كل أنواع الأكل بشكل عام بدون سبب طبي واضح، لأن ربنا خلق لنا أصناف كثيرة نافعة، والأصل في الأكل الاعتدال وعدم الإسراف.
قال تعالى:
﴿وَكُلُوا وَاشْرَبُوا وَلَا تُسْرِفُوا﴾
وقال رسول الله ﷺ:
«ما ملأ آدمي وعاءً شرًّا من بطن… فإن كان لا محالة فثلث لطعامه وثلث لشرابه وثلث لنفسه».
الخلاصة:
كل باعتدال، تابع جسمك، واسمع كلام الدكتور اللي متابع حالتك، بدون تطرف في التحليل أو التحريم 😊"