https://www.facebook.com/738014172720083/

Sk Indodakazi Yosizi, Randburg (2026)

16/07/2026

Imfihlo kaGogo

*ISAHLUKO SESIHLANU* (5)

Sk Indodakazi Yosizi

Ngiyakwazi ukuthi lubambo lwakho ngempela kodwa yenza usuke lapho yisikhathi sokuthi bevuke, imisebenzi ibalindile kumele bepheke isidlo santambama, Bambanani buya lapha ulungise bevuke ilanga lingakaze libuyele kunina ngoba angifuni ukuthi sigcine sesisidla lezinanakazana zabomakhelwane."Kwakukhuluma uMakhumalo.
"Kutsho wehluleke lokuthi uzibambe ngiqale ngiqede lomuntu wami, yazi umona yilifa lezinja misa umona Makhumalo ngoba uzaloya." Kwakukhuluma uSenzo.
"Utsho njani ukuthi ngizaloya? Ngoba uyakwazi ukuthi ngiyaloya ngingumthakathi omkhulu ngiziqhenya ngakho, ngingaloyi wena Senzo ngabe awukho lapha lobunandi bonalobu obuzwayo ngabe awubuzwa bonga ukuthi ngakwanisa ukukuthatha ngakwamukela ngezandla zami ezifudumalayo ngakunikeza uthando kanye lekhaya lenjabulo, namhla uyaqolotsha kungenxa yami ngize ngakunikeza lomzukulu wami engimthandayo umphathe kahle ngoba ungekela soze kulunge, mina lawe soze sathelelana amanzi ngiyakukhuza."Kwakukhuluma uMakhumalo.
"Sikhangezile Sikhangezile ndodakazi yami! Vuka vuka uyaphupha bakulalisa lezinanakazana, vuka ntandokazi ungavumeli imimoya ikulandela vuka ukhulekwe ilwa ilwa ungavumi uMakhumalo ekusebenzisa."Kwakukhuluma uSilibaziso efike eliphupho kuSikhangezile.
"Mama wena ngazo zonke izikhathi nxa ngikudinga uvele unyamalale awuveli ngitsho langephupho, manje ngisemathandweni ngithole umuntu ongithandayo sufuna ukuzongichithela engilakho, kutsho mama awufuni kungibona ngijabulile nguwe ovimba injabulo yami ngazo zonke izikhathi."Kwakukhuluma uSikhangezile.
"Wena uyazi uyintandokazi yami nzohlala ngikufisela okuhle kodwa, wavunda esibelethweni sami ndodakazi yami okwenyanga eziyisitshiya galo lunye s**a lapho ngawa lawe ngivuka noma wayengekho ofuna ukungeseka ngama ngaqina ngoba indlovu ayisindwa ngumboko wayo, kube ngangikufiseli inhlanhla ngabe ngakuchitha usaselihlwili Sikha bonga unembeza wami ngoba namhla uyawadla amabele kungenxa yonembeza wami, ugogo wakho uMakhumalo lo othi uyakuthanda kakuthandi vuka emaqandeni ngoba ufuna ukukusebenzisa Sikhangezile Banibuso ontaba engabhodwayo owayibhodayo wafa, ontaba enkulu lina elachapha uZambezi ngexolo, lina elitshaya uxakuxaku ngombhobho ilwa ntombi endala ungavumeli imimoya ikusebenzisa."Kwakukhuluma unakaSikhangezile osewalala ubuthongo obungavukwayo.
"Hayi mama liyakhuluma mina ngiyakhathala ngoba seliza lingitshayisa ngekhanda, ngikhathele ngendaba zenu ngoba namhla libamba lapha kusasa libamba lapha lingekele lobambo lwami mina,ngizalinda nxa sekufanele ukuthi ngilidinge."Kwakukhuluma uSikha.
"Senzo ncela ukuphelwlisa umsebenzi wami, njalo uSikha lingamlalisela amahle uzalihlupha ngoba ngazo zonke izikhathi unina uyafika ebuthongweni, kwamele lenze izinto ngokuphangisa njalo uSilibaziso uyamlwela asenzeni ukuthi atshade loSenzo masinyane."Kwakukhuluma uBambanani.
"Uqinisile ngoba manje unina ubefikile ebuthongweni okuhle yikuthi uSikha wenqabile unkosikazi wami, kwamele siyidlele amathambo enqondo okwamanje asiyibekeni ilitshe sizayikhuluma ntambama la esihlangana khona kumele siphume lesixazululo."Kwakukhuluma uSenzo.
Bavumelana bafulathela uBambanani wenza umsebenzi wakhe wasecitsha lamaphupho wonke akaSikha wamtshiya lawothando wodwa.
"Yeyi lina vukani vukani, njenganini eliyake lilale ilanga lize liyeziphosela kunina, liyasutha vukani lipheke umfowenu uyengaphi vukani ilanga selitshonile."Kwakukhuluma uMakhumalo.
"Sikha Sikha! Vuka ugogo uyasibiza uyatshinga vuka sambe."Kwakukhuluma uNomathemba evusa udadewabo.
"Esh mina ngikhathele umzimba wami ubuhlungu uyathi bengithwele into ezinzima, hamba umtshele ukuthi ngitshaywa likhanda ngiqedise ubuthongo bami, mhlawumbe ngizathi sengivuka amadino azabe seyehlile."Kwakukhuluma uSikha.
"Hayi noma kuthiwa ngiyakuthanda ngeke ngivume mina, utsho ukuthi ngiyetshela ugogo ukuthi uyagula wena ungaguli ufuna ngiyesebenza ngedwa noma kutshiwo ngeke ngilenze lelo phutha vuka nje sihambe ngoba indaba yakho ayikho, ukhathaliswe ngamabhayi onawlawa obukade uwembathile uzafela engutsheni nkazana asambe siyepheka singaqeda sigeze uzabona uzezwa amadino sehambile." Kwakukhuluma uNomathemba.
Basukuma baqonda emkhulwini bafika bapheka njengenjayelo.
UNomathemba waqala ukutshinga ethi kungani bepheka ukudla okunengi imihla lamalanga njalo lokudla kwakhona kungala sawudo yena uyakhathala namhla uyafaka isawudo uzathi ukhohliwe.
USikhangezile wamphendula wamkhuza ethi yena kafuni kubuya epheke njalo, uyakwazi ukuthi ugogowabo uzathi bepheke njalo yena kafuni kukhulunyelwa njalo kafuni kuhlokoza inyosi emlindini ekwazi kahle ukuthi zizamluma nxa ekwenza kakwenze yena engekho ngoba yena soze alunge, uyakhathala ngokutshona emi ezikho ephekana lokudla.
"Kodwa tshela mina Sikhangezile hayi kabi lowu ngumbuzo omsulwa odinga impendulo yakho, ugogo yena imali engaka uyithatha ngaphi? Njalo kudala ugogo wayesebenzani eyamenza waba lemali engaka engapheliyo?ngibuza kanje lento iyangikhathaza ngihleli ngizibuza kodwa angiyitholi impendulo?"Kwakubuza uNomathemba.
"Uyakwazi lawe lami ngizelwe izolo angilalo ulwazi lombuzo ufuna uwubhekisa kuye ugogo, ngoba mina ngingafakaza amanga kodwa lami ngiyafisa ukwazi mhlawumbe lathi singasebenza njengogogo ubona njani sibe lemali enengi."Kwakuphendula uSikha.
Bakhuluma kabanzi basebevumelana ukuthi ngolunye usuku bazombuza ugogo mhlawumbe labo bengasebenza nzima njengaye engabanikeza lokuhlakanipha ngoba sebekhulile, kuNomathemba laligaya ngelomhlathi, waba lembuzo eminengi eyayidlala emqondweni wakhe owayesefisa ukuyibuza udadewabo kodwa engakwazi ukuthi engamqala njani.

Obhalayo ngu S-K indodakazi yosizi eyakoMadabe

15/07/2026

Imfihlo kaGogo

*ISAHLUKO SESINE* (4)

Sk Indodakazi Yosizi

"Okumangoye kuyasola uMakhumalo ebesitsho inyoka ubengakhulumi ngomzukulu wakhe, hayi logogo uyimpisi ephangayo kutsho inhlathu le ngeyakhe, kubuhlungu yikuthi nxa kade isizwa izwile imfihlo yonke ekaNyathi sengikhulekela ukuthi bengambulali nzoba yini ngaphandle kwakhe."Kwakukhuluma uMaMoyo ekhulumela enhliziyweni wabamba umthandazo omfitshane ecela ukuthi ingilosi zezulu zivikele uNyathi ngoba akalalo icala.
Behlukana uMaMoyo loMakhumalo, uMaMoyo kasazange wahamba ibanga elide wahlala phansi walinda uNyathi ukuze bekwazi ukuqhubeka ngohambo lwabo.
Wathi engena uMakhumalo ngasesangweni wavele wacabanga esiphaleni sakhe.
"Yeyi lina vukani lithula kanjani lendaba engaka lekela uSenzo ehamba lingangitsheli, hambani liyelalisa abamtwaba ngoba ngifuna ukukhuluma loSenzo nxa efika lapha."Kwakukhuluma uMakhumalo esitsho kuzinanakazana zakhe ozifuyileyo watsho lokuthi zenze konke okusemandleni ukuthi noma ekhuluma abazukulu bakhe bengamuzwa.
Lakanye wasukumela phezulu uBambanani efuna ukuzwa ukuthi kuhamba njani wafika wenza njengenjwayelo abamtwana balala okosane oluncane, waqeda wajika waya egumbini la uMakhumalo owayeseye khona wayeganwe unwabu uMakhumalo engafuni kuzwa, wayesemphuzela uBhilu ukuthi afike.
"Sangena thina sangena iyelele thina sangena kwakhala ingane encane, encane encane encane bo! Thina sangena kwakhala ingane encane lamhla umoya wami uyavuma." Kwakuhlabela uSenzo." Kwakukhuluma uSenzo ezama ukuhlabela ngoba wayejabulile.
"Heyi wena! Uphume njani lapha ngubani okunikeze imvumo yokuphuma usithatha ngaphi isibindi sokulandela abamtwana bomtanami?"Kwakubuza uMakhumalo.
"Zwana ntombi endala nxa ukhuluma lami funda ukuzehlisa ngoba angisuyena usowenu, njalo angibekelwa imgqomo lempandela ukuthi ngenzeni ngingayenzini ngasiphi isikhathi, tshela mina wena awukwazi ukuyamukela umuntu nxa engena emzini wakho egcwele injabulo umuzi lowu umile nje! Ngamandla ami izithukuthuku zami ungangitsheli okokwenza wena uwonakele bayakwekelela oBambanani labo Bhilu bakho kimi ungaqali ngoba ngizakweqa."Kwakukhuluma uSenzo eganwe unwabu.
"Lapha usemzini wami Senzo ungakhohlwa kukhala esami isicathulo nxa uphuma ngasesangweni kwamele utsho ukuthi uyaphuma lokuthi uyangaphi, asikuthi ngiyalwa lawe yikuthi ngikhathazekile cabanga nje ngabe isiyoyo sendoda lesana sikubulele bengizoba yini ngaphandle kwakho, mina nxa ngingekho nxa uphuma tshela abafowenu yikho ubona ngalidinga labayizinanakazana ezehlukeneyo kwaba khona izinanakazana eziduna kwaba khona ezisikazi ngiyabe ngenzela ukuthi nxa abanye bengithumela izinanakazana zabo zithole kulabafazi lamajaha zise ziphelele esangweni seziqomene, pho wena nxa uphumile ngubani ozasala ekwenza khonalokhu Senzo uyazi inkulu indima oyidlalayo empilweni yami, okwamanje ngikhathazekile kungani ubulandela abazukulu bami?"Kwakubuza uMakhumalo.
"Makhumalo ungithembisile wathi uSikhangezile sezakuba ngunkosikazi wami pho ngingayekela kanjani unkosikazi ehamba yedwa ezaze eqonyiswe ngamanye amajaha, Makhumalo uyazi ngiyamthanda uSikhangezile ngivumele ngihambe laye la oya khona, njalo kwamele ungibonge ngoba ivezandlebe lakho elinguNyathi beselikhupha yonke imfihlo kodwa ngadlala eyami indima angithi lawe uyangazi abazange bezwe lutho ngiqonde ukwenza umoya omkhulu ngabavala indlela, ngagcina ngizikhohlwa sengijabule kakhulu ngoba amandla ami ebe esebenza kanzima ngavele ngayekela bangibona ngethukile lami sebengibona ngisegcekeni bekungasiyona inhloso yami."Kwakukhuluma uSenzo.
"Ngiyabonga usebenzile yikho ngikuthanda khululeka uSikhangezile ngowakho sengilinde ukuthi amukele isipho esivela kuwe udiyo engalwamukela konke kuzabe sekumi ngomumo, kodwa uyakwazi ukuthi uSikhangezile uphose wafa ngokubona wena uvele wangena phakathi kwamabhayi ukutshisa ubengasakuzwa,ngithe ngisiza kuwe ngavele ngamtshiya ejumekile."Kwakukhuluma uMakhumalo.
"Khululeka uzangijwayela ngoba ngingumnyeni wakhe mana ngiyembona ngoba ngizagcina ngifelwa ngumfazi ngilokhe ngithonisa amacala khonalapha."Kwakukhuluma uSenzo, etsho efulathela esiyabona iphakade lakhe egumbini.
"Heyi madoda yaqonywa insizwa isiphalaphala sentombi madoda isiphalaphala into enhle into emi kahle, awusemuhle ntombi endala umuhle noma wethukile umuhle njengelanga liphuma uyabona ibizo elithi buhle laba khona wena uwela kulumhlaba ngoba kwakutshiwo wena."Kwakukhuluma uSenzo ekhuluma lawo mazwi ephulula uSikhangezile ngomsila ngapha emkhotha ngolimi.
USikhangezile wayengezwa lutho ngoba wayejunywe yibuthongo waqala ukuphupha elomuntu oyindoda ebona sesemathandweni besendaweni enhle okwenye indlela bedlala beqabulana ngapha besenza ucansi. Wayebukeka ejabulile ephupheni lakhe watsho ngenhliziyo wathi yilo uthando obelufuna useze wamthola othandwa yinhliziyo yakhe ozomphatha kahle, emaphutsheni eke ezibone eseqela ezandleni zomuntu wakhe umuntu emgama eqeda emqabula kancane kancane esehla, nxa kunjalo kuvele kuthi ehlanye esebona angazani nguye yedwa emhlabeni kaJehova osemathandweni, wayebona labantu sebembukele bemdlela umona.

Obhalayo ngu S-K indodakazi yosizi eyakoMadabe.

15/07/2026

Imfihlo kaGogo

*ISAHLUKO SESITHATHU*

Sk Indodakazi Yosizi

Wakhuluma kabanzi uNyathi inyembezi zehla uMaMoyo wethuka ebona uNyathi ekhala wayengakwazi ukuthi uNyathi udlule emtweni ezinzima, ngoba ehleli embona ehleka, kukathi uveza izinyo lenja phakathi inhliziyo yopha igazi.
"Kwaze kwakubi ! Ngiyaxolisa bengingakwazi uxolo mfowethu uzangifakela izandla emanzini bengingaqondanga ukukuvusela amanxeba,bengingakwazi kutsho ngesikhathi kwenzeka isigameko lesi ngangisemendweni eNkayi koSivalo bengakangigili, mfowethu qina koze kulunge uNkulunkulu nguye oyaziyo, manje esifeni wakwanisa ukumphelekezela yini uSilibaziso?" Kwakubuza uMaMoyo.
"Hayi kulungile ngoba sengayamukela, okubuhlungu yikuthi angiyanga lasemfeni yakhe labamtwana bami nampa ngibabona nsuku zonke kodwa kubuya kube nzima kimi ukuthi ngibatshele ukuthi nginguyise wabo, sengilinde ukuthi uMakhumalo ethwale umhlabathi ngesifuba ngibe sengibatshela ngiyazi balembuzo emnengi abazabe befisa ukuyazi ngami angikwazi ukuthi bazangethemba na? Ngoba kathesi ubabona belapha esikolo yimi engenzayo kodwa akula muntu okwaziyo uSikhangezile uze waqeda izifundo zakhe zonke kuyimi engimbhadalelayo yena wayezitshela ukuthi ubhadalelwa nguhulumende kuyimi loNomathemba ngisambhadalela lakathesi into enhle yikuthi ababalisi bakhe bathi wenza kahle ezifundweni zakhe,mana ngithule ngizakuxoxela ngelinye ilanga ngoba nampa abantu kanje isifuba sakho sakhahlelwa lidube uzahamba sutshela abantu indaba zami."Kwakukhuluma uNyathi.
"Cha cha angisoze ngilenze lelo phutha! Njalo indwangu zihlekana iziphongo usukhohliwe ukuthi lawe esakho isifuba asigcini incekeza angazi leyi yona wayigcina njani angikho lapho kumbe izulu liyanetha mina sengizwele ngokuthwala amanzi wmfuleni ngoba kulibanga."Kwakukhuluma uMaMoyo.
"Khona kunzima mpela lami ngikhathele ngiyazibuza ukuthi inhlathu le sizayibulala noma sidlalisa amandla ethu?" Kwakukhuluma uNyathi.
"Kwamele ife ngoba ngifuna isitshebo mina." Kwakukhuluma uMaMoyo.
"Kanje uliganyana inhlathu ayidliwa ungabolalela abantu bekuqila, inhlathu ungayidla mhla wagula nxa sekumele ufe hehehe inhliziyo iyabe ilokhe itshaya kodwa kungasela lutho."Kwakukhuluma uNyathi.
"Hayibo lina selizicabangela ukudla inhlathu kutsho phela MaMoyo inyoka uyayidla ngiyakwesaba, Nyathi ungavumeli iphakade lakho liyidla ngoba uzakuba senkingeni enkulu kakhulu nxa sekumele eyetheza inkuni labogogo umphefumulo usuhambile inhliziyo isisala ukuthula, ingaphi yona inhlathu kutsho iyahlola selokhu ngathwetshulwa yingwe angikaze ngizwe kuthiwa kubonakale inhlathu lapha sekungenzeka kube kungekaMakhumalo umthakathi omkhulu, ibihamba ikhangela abamtwana bona basebeyibona bethuka."Kwakukhuluma uDube eze egijima laye esezwe umkhosi kasazange wathanda ukulinda ukuthi ezwe ukuthi inkulumo kaNyathi loMaMoyo iphelela ngaphi.
Bambonisa uDube inhlathu bavumelana bonke ukuthi yinhlathu kaMakhumalo ngoba kuthiwa ulenyoka ehluphileyo edonsa abantu bathwele nzima ngayo kanye lobabhemi wakhe ongala phambili lamuva.
UDube wethuka ebona kuyinqumbi yenhlathu wasecela ukuyolahla amanzi kwase kwaba yikubaleka kwakhe.
Inhlathu yayinganyakazi ilokhe imi endaweni eyodwa ngoba inhlathu nxa ingezwa izisindo zomuntu iyama noma ingakamboni umuntu kwasekukudala imile.
"Yeyi lina bamtwana bakaSilibaziso lithi kwenzakalani khonale esifuleni mina angiyi lapho, njengoba lisitsho lithi uNyathi ukhonangale ngimnyanya ukufa lowo soze ngihambe anginyatheli la okunyathele khona uNyathi ngoba asithelelani amanzi."Kwakukhuluma uMakhumalo.
Wenqaba ukuhamba uMakhumalo noma wayekhuluma njalo uSikhangezile wayesezimboze ngamabhayi lokutshisa engasakuzwa, wavele wajunywa yibuthongo ngoba wayeyethuke kakhulu.
UMaMoyo loNyathi babona kungcono ukuthi beyekele inhlathu izihambe uMaMoyo wezwa ubuhlungu wabona ngazani idlozi lobuyanga lihleli laye yilo elihamba limvalela indlela zakhe, kodwa kwakungala ongakwenza.
"Nomathemba uthi kwenzakalani ngizaze ngifelwe ngumtwana liboneni?"Kwakubuza uMakhumalo
Wenqaba ukukhuluma uNomathemba ngoba wayethembise uNyathi ukuthi uzaginya ilitshe, ngemva kwesikhathi uMakhumalo wabona kungcono ukuthi ahambe ayebona ukuthi abamtwana baboneni wathi esendleleni wahlangana loNyathi kanye loMaMoyo wasebabuza uMoyo wasesithi ngcono behambe beyebona, baphenduka laye bafika bayithola inhlathu isamile.
UNyathi wadobha ugodo waqala ukuzama ukuyibulala, uMaMoyo ethe sece eseleni kukaMakhumalo efuna ukubona ukuthi kuzoyenzakalani, wayefuna ukuba lesiqiniseko sokuthi uMakhumalo ngumthakathi.
Inhlathu yaqala ukuhlanya yahlanya okungenziyo okwenza uNyathi wabona ukuthi uqinisile uMakhumalo ngumthakathi, wabona kungcono ukuthi bayiyekele bayekela yazihambela.
"Kungani inhlathu ibisitshinga ilibona ihwabha ekutheni isikhathi sonke ibizilalele?" Kwakubuza uMaMoyo.
"Ngizaba yazi njani izinto ezitshangwa yinyoka mina, njalo nxa wena befuna ukukubulala ngeke uzilwele inhlathu yenze kahle ngoba layo ivizilwela, ukulwa kwayo kuyincedile nanku ligcine liyekela."Kwakuphendula uMakhumalo.
Ngapha laligaya ngelomhlathi ezibuza ukuthi uBhilu ufike njani khonale ubedingani ngoba yena ubezitshela ukuthi usesiphaleleni labanye.
Wadideka kakhulu uMakhumalo uMaMoyo waze wananzelela wasembuza ukuthi ngoba ebukeka edliwa yini kumbe usecabanga abantwana bakhe asebalala ubuthongo obungavukwayo.
"Cha cha ntombi yakoMoyo ngizibuza ukuthi ufike njani lapha kahle kahle uzondeleni ngoba ubukeka ethukuthele."Kwakukhuluma uMakhumalo.
"Hayibo ufike njani lapha litsho ubani kumbe litsho inhlathu?" Kwakubuza uMaMoyo.
"Aaaaah inhlathu njani manje? Mhlawumbe inhlathu ithunywe ngabaphansi mina ngitsho uSikhangezile ngoba ngimtshiye esephakathi kwamabhayi."Kwakukhuluma uMakhumalo wazisola sethe ufike kanjani ngoba wayesitsho inhlathu.

Obhalayo ngu S-K indodakazi yosizi eyakoMadabe.

13/07/2026

Imfihlo kaGogo

ISAHLUKO SESIBILI (2)

Sk Indodakazi Yosizi
* *

"Yoooooh hayi ngiyalizwa udiyo lwenu lusebenza njani ukuze lwehlise inhlanhla gogo? Njalo loludiyo lulani phakathi kwamele ngiluvule andubana ngiluthatha ngoba mina angiyithathi imbuzi evalelwe esakeni." Kwakukhuluma uMandazi.
"Sikhangezile angimthandi mina umuntu otshaya indiva ungagudli iguma ntombazana, mina uyazi angiyitshayi inja ngifihla umphinu, udiyo uyaluthatha noma cha? singabi sikhuluma ngento eyodwa ngilemsebenzi eminengi kakhulu engilindileyo uyaluthatha udiyo noma cha, nxa ungalufuni ngizalunikeza uNomathemba ngoba laye uyafisa ukuphumelela njengabanye abamtwana ahambe ngemota eziphezulu, angithi uyizwile indlela obebabaza ngayo inqolamlilo yomngane wakho ethi abanye abamtwana bayaphumelela lina izikhindi zomzimba ziguga njalo kodwa impumelelo ayikho."Kwakukhuluma uMakhumalo.
"Lapha gogo selingivalela ensitha, liyazi ngeke ngivume linikeza umnawami into ezavuka imlimaza kusasa kulungile ngizoluthatha, kodwa soze ngiluthathe namhlanje linikeze amalanga ngizolwamukela."Kwakukhuluma uSikhangezile.
"Kulungile ngikunikeza usuku olulodwa, kusasa angifuni kukuzwa usubamba lapha uyekela isipho sakho kusasa uyasamukela, ngaze ngaziqhenya ngawe mzukulu wami."Kwakukhuluma uMakhumalo.
Behlukana uMakhumalo loSikhangezile ngemva kokuvumelana kwabo uSikhangezile inhliziyo yayiwopha igazi engakwazi ukuthi abafowabo uzabatshela njani, ngoba behleli bekhuluma besithi nxa uMakhumalo ethwele uzatshiyela yena ngoba eyintandokazi kaMakhumalo.
Ngesonto ekuseni uSikhangezile lecinothunjana uNomathemba bavukela emfuleni ukuyokhela imbuzi amanzi, bathi besendleleni sebekhangelele ukuyachapha isifula kwezwakala abantu ababehamba bezixoxela bema uSikhangezile balalela ngemvva kokulalela uSikhangezile wacela umnawakhe ukuthi bacatshe bengababoni, ngoba yena kamthandisisi uMaMoyo uthanda ukukhuluma into ongazazi ikakhulu nxa esehlangene loMsakazo 7 uNyathi.
Bavumelene bachatsha ngemva kwesihlahla somtshekisane esasiseceleni kwendlela.
"Yabona mina nxa kuyisalukazi senalesi uMakhumalo ngimzonda ukufa nxa mbona la onyathele khona kuthi ngiphalaze, nxa kungulowu umzukulu wakhe omfake ngaphansi kwezidwaba zakhe laye ngimenyanya ukufa."Kwakukhuluma uMaMoyo.
"Lawe ukhona vele umuntu owake wathanda umthakathi lami ngimnyanya kabi lomama angimphiwanga, zinengi izinto owazenzayo ezihleli zinhlukumeza, uSikhangezile yena kala cala zonda umthakathi uMakhumalo kuphela! uSikha ungamfaki ngoba ngumtwana ngikhulekela ukuthi inhliziyo yakhe embi le ingabi ngumthelela ngoba ingaba ngumthelela sisazokhala."Kwakukhuluma uNyathi.
"Uyamela uSikha kanje kuthiwa ngabamtwana bakho lami ngihleli ngisizwa amahemuhemu, abantu bayakhuluma phandle lapha Nyathi, mina ngingcono ngoba angikunyeyi ngiyakutshela."Kwakukhuluma uMaMoyo.
Bathi bengakaqedi ukukhuluma uSikha lodadewabo uNomathemba bavumbuluka samvundla oxotshwa yizinja.
"Yeyi lina lizasethusa kwenzakalani likhanya lithutsha lingadlanga nkotshane kwenzakalani libalekani?"Kwakubuza uNyathi.
"Yinyoka malume yinyoka! Kuphendula uSikhangezile.
"Ingaphi litshengise njalo inganani?"Kwakubuza uNyathi.
Wazama ukulinganisa uSikha kodwa wayesehluleka ngoba wayeqhuqha ephela amandla.
"Ingaka ingaka! Kwakukhuluma uMakhumalo.
"Angizwisisi ukuthi inganani, ingaphi yona ngiqedelane layo,ngoba mina angifuni kubona inyoka ngiyitshiye iphila ngiyabe sengicabanga ukuthi iyangilandela izobuya ingilume."Kwakukhuluma uNyathi.
"Nansana malume ngaphansi kwesihlahla somtshekisani lunguzanini lizabona." Kwakukhuluma uNomathemba etsho ekhombela ngaphansi kwesihlahla.
Wathi ethi mehlo s**a uNyathi wabona yinkalakatha yenhlathu.
"Hayibo yinhlathu phela leyi! Kuyamangalisa ukubona inhlathu endaweni enje, liyibone njani lina njalo ivela ngaphi khonalapha?" Kwakubuza uNyathi.
"Manje Nyathi bazoba yazi njani abamtwana labo bahlangane layo, kodwa lina belisiya ngaphi khonale ngoba indlela nansi lapha libe lisiyadingani ehlathini?" Kwakubuza uMaMoyo.
"Besisithi siyakhangela umtswantshabakhwa kanye lomthunduluka laphana." Kwakukhuluma uNomathemba.
"Ngalesi isikhathi ngoba nje asiso sikhathi semthunduluka kumbe selikhombile lina bamtwana?" Kwakubuza uMaMoyo.
"Cha asikhombanga ngiqinisile mamomdala, yikuthi uSikhangezile ubengiphikisa ngesikhathi ngimtshela ukuthi kulezithelo lapha, yikho sithe saphambuka ngisithi ngiyamtshengisa ngebhadi sasesihlangana lobabamkhulu."Kwakukhuluma uMaMoyo.
"Lina nxa lingikhangele libona angazani ngizelwe izolo, kumele ngiyelihlola, Nyathi senza njani ngenhlathu leyi uyabona singayibulala siyayithengisa siyabe sizayenza imali ngoba inyanga ezinengi ziyayifuna inhlathu kuthiwa isebenza okungenziyo njalo ungayidla kuthiwa awufi cabanga sengiphila kuze kubephakade yooooh mina ngingajabula."Kwakukhuluma uMaMoyo.
" Nxa ufuna imali ntombe ndala yibulale mina soze ngiyikwanise ngingedwa, lina gijimani liyebiza abantu ekhaya libize loMaKhumalo ukuthi ezobona imhlolo lingakhulumi ukuthi libone inhlathu ngoba uzoyenqaba ukubuya."Kwakukhuluma uNyathi.
Bagijima uNomathemba loSikhangezile besiyabiza abantu ukuthi bezoncedisa uNyathi ukubulala inhlathu.
"Manje wena kungani uthi bebize UMakhumalo angithi uyazi ngumfazi njalo kasoze eyibulale uzayala layo singayibulala ethi ibonwe ngabamtwana bakhe, thina asisoze sisathola lutho kanje vele izithukuthuku zezithutha zidliwa yizihlakaniphi namhla nzokubonela kithi."Kwakukhuluma uMaMoyo.
"Khululeka ungesabi inhlathu kungafika umthakathi khonalapha iyahlanya soze liyibulale, ngifuna ukubona ukuthi ngempela ngempela uMakhumalo ngumthakathi noma ngiyamcabangela, uyabona uNomathemba lomfowabo ngabamtwana bami sehlukaniswa nguMakhumalo ngendodana yami yakuqala, ngamukela isimo ngabaleka uSilibaziso wahamba wayazala uSikhangezile, ngemva kweminyaka sahlangana sakhulumisana savuselela uthando lwethu, wakhulelwa uSilibaziso uMakhumalo walwa wayeganwe unwabu wathi sehlukane uSilibaziso wenqaba wathi sohlukaniswa yikufa kwase kwaba yikho ukufa kwakhe, ukufa kwakhe akuzange kuqedakale ngoba watholakala efele kuMbagwe evele theza inkuni kosikhume, nxa besitsho ababonayo khanya wethula kahle umnyaba ngemva kwalapho khanya kukhona into owayesilwa layo imkhama kodwa zange bebone ngitsho unyawo, njalo umphakathi wakoMadabe wathi uthi uyayisukumela lendaba uMakhumalo wenqaba wathi uzoyenza ngendlela yakhe onguye obulale umtanakhe uzawukhomba umuzi olotshwala, umphakathi walinda walinda kodwa zange kwenzeke lutho, kuze kube namhlanje ." Kwakukhuluma uNyathi.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

10/07/2026

Imfihlo kaGogo

ISAHLUKO SAKUQALA (1)

SK Indodakazi Yosizi

Esigabeni sakoMadabe ngaphansi kwenduna uWasi Ndiweni, sihlangana lentombazane eyintandokazi kugogo wayo, uSikhangezile Nleya ezalwa lomfowabo oyedwa oyilo izibulo uSiyabonga kanye lecinothunjana uNomathemba.
USikhangezile kugogowakhe uligugu uyikho konke noma ugogo ebathanda abanye abazukulu kodwa uthando olalo uSikhangezile luvele lubesobala okwempabanga yembuzi esemadolo ngoba kalufifihli. Ngelinye ilanga uMakhumalo wathi ezihlalele loSikhangezile wabona kukuhle ukuthi amnikeze ezinye zenkemba zakhe obezisebenzisa.
"Sikha uyazi lawe ngiyakuthanda ungathi nguwe izibulo lalapha ekhaya kodwa ngikhohlwa ukuthi bakhona abanye." Kwakukhuluma uMakhumalo.
"Gogo sekwenze njani lingagudli iguma ikhona into eseliyifuna phela wena gogo ngiyakwazi ungumlomo mnandi hlala phezu kodaba ungabe usaphozisa amasekho angithi uyazi indaba ngiyazithanda, lazo ngokunjalo ziyangithanda."Kwakukhuluma uSikha.
Wavele wabobotheka uMakhumalo wasukuma eqonda egumbini lakhe wasecela ukuthi uSikha amlandele kukhona udaba ofisa baluhlafune.
Laye ngokunjalo uSikha weqela phezulu njengonteletsha osubone izinja, weqa egcwele ukuthokoza.
"Mzukulu uyalubona lolu udiyo uluthathe uluphathe kahle uluphathe mnene mtanamtanami, ngiyakunikeza lufumbethe okukhulu izibusiso zakho zizaphuma phakathi kwalo lolu udiyo." Kwakukhuluma uMakhumalo
Etsho emnikeza udiyo lwegazi.
"Ngiyabonga muntu omdala, ngiyabonga kodwa ngicela ukwazi ukuthi lenkemba ifumbetheni phakathi kwayo andubana ngiyithathe ngoba soze ngithenge imbuzi emgodleni?" Kwakubuza uSikha.
"Lenkemba ifumbethe ikusasa lakho, imbila yaswela umsila ngokulayizela, wena uzaswela izibusiso ngokubuza thatha lento ayila bungozi uzophila ngcono."Kwakukhuluma uMakhumalo.
"Ngicela ukwazi imgqomo yayo ngoba angifuni into ezangihlupha kusasa, lokho kube kubangelwa yikuthi angibuzanga ekuqaleni, gogo asethembe lento ayila bungozi ayisoze ingixabanise lomdeni wami, kusasa sebevuka bengibeka amabala ngento engayazi?" Kwakubuza uSikha.
"Nxa ungakwanisi Mandazi ukuthi uyithathe kulungile ntombi endala, ngoba mina ngiyakhathala ukubuzwa imibuzo kutsho ngizoyinikeza udadewenu okwelamayo, ngoba lento ifumbethe inhlanhla, nxa kungenzeka ngitshone ngiyiphethe lisazodubeka impilo yenu yonke, njalo nxa kungenzeka udadewenu aluthathe lolu udiyo usazowacabanga amazwi ami usubona udadewenu okwelamayo izinto zakhe zimhambela kahle."Kwakukhuluma uMakhumalo.
"Gogo kunganjani unginikeze isikhathi ngikwazi ukucabangisisa ngalolu udiyo, nxa kwehlula uyabe uzalunikeza udadewethu ongelamayo angazi ukuthi yena uyabe ezalwamukela noma cha?" Kwakubuza uSikha ecela ukuthi ugogo amnikeze ithuba.
Bayehlukana logogo uSikhangezile wahamba wayahlala phansi waqala ukudla amathambo enqondo, wadideka engakwazi ukuthi eyenze njani ngoba ugogo wayesembeka amabala ngokwenqaba ukwamukela udiyo ethi uzolunikeza uSijabulile.
Wahlala phansi uMandazi wadla amathambo enqondo ezibuza mayelana ngodiyo ofuna ukulinikezwa nguMakhumalo.
Waqala ukuphupha ngodiyo lukaMakhumalo amaphupho akhe ayemdida engakwazi ukuthi ebambe ngaphi etshiye waswela lomuntu owayengamhlaziyela amaphupho akhe.
Babethi noma behleli umdeni uhlangane usidla inxoxo zomlomo uMandazi yena wayevele engabanaki ngoba ngomqondo ekhatshana,
"Mandazi dade sewake wambona umngane wakho lowana owafunda laye ukuthi uhamba ngenqolamlilo enjani?" Kwakubuza uNomathemba.
Noma uNomathemba wayekhuluma uMandazi ngomqondo wayekhatshana kazange emuzwe, bonke bavele bamvulela amehlo njengembuzi ephekwe lempondo zayo.
UNomathemba wayiphinda njalo indaba yakhe, wavele wathula njalo ngoba engamuzwa ligaya ngelomhlathi.
"Hayibo wathula Mandazi bekhuluma ngawe kwenzakalani kumbe abafana sebelutshaye phakathi? Phela izinjiva bezizinengi kakhulu lapha ngekhefu lekhisimusi mhlawumbe bavele batshiya imbewu, yikho limbona ethuli kanje iyamudla lendaba mhlawumbe kakwazi lokuthi umtwana ngokabani ngoba phela ungadakwa abafana ngekhisimusi bavele badlalele kuwe bonke bakhohlwe lokugqoka ijazi, yooooh manje lani laselingikhangela kangaka ngiyadlala mina." Kwakukhuluma uSiyabonga indodana kaNleya engumfowabo kaMandazi.
"Yazi lawe mfowethu uyawulahla umlomo kwake kwakhulunywa kanjalo, nxa kungenzeka ukuthi ukhulelwe ungaphatheka njani ubona udadewenu ekhulelwe umthwalo ongawazi ukuthi ngokabani? Mfowethu ngicela nxa ukhuluma uwagade amazwi akho uzibuze ukuthi nxa lamagama lawo singawaletha kuwe ungaphatheka njani? Mandazi dadewethu kungabe konke kuhamba kahle yini?"Kwakubuza uNomathemba.
"Ake limekele lina walihlupha kangaka kwenzakalani ngani limekele alifuni ngilethele inganekwane yini, ngoba mina kudala ngikhula amatshe esancwebeka ugogo lomkhulu babethanda ukuthi ntambama nxa sesidlile isidlo santambama besethele inganekwane ezimnandi."Kwakukhuluma uMakhumalo.
"Gogo lizasethela inganekwane ntambama kathesi lisekele siphumuze umqondo, Mandazi kwenzakalani ngawe udliwa yini?" Kwakubuza uNomathemba.
"Hayibo utsho njani ukuthi ngidliwa yini? Inkinga yenu liyathanda ukufaka amakhala enu endabeni zabantu alifuni kubona umuntu ethuli, sekulicala yini ukuthula nxa kulicala ngcobo lingekele ngibotshwe ke ngoba mina ngifuna ukuthula."Kwakukhuluma uMandazi.
"Hayi ngamatshe Mandazi hayi ngodlame wasugadla kwenzenjani? Inkinga wena nxa ulenkinga awufuni kusitshela uzafa usasemncane ntombi ungavumela inhliziyo ake uzame ukusivulela isifuba mhlawumbe singeza lezixazululo, kodwa angikho lapho ubusuzwile yini ngomngane wakho ukuthi kuthiwa uthenge inqolamlilo engenziyo yeyi abanye abantu uNkulunkulu uyababusisa laye ubusisekile kutsho amadlozi akibo alaye,ayamkhusela ngazo zonke izikhathi."Kwakukhuluma uNomathemba.
"Manje mina ungitshelela ukuthi ngenzeni? Ngisukume yini ngigiye ngitshaye umpululu ngithi umngane wami selemali ungazongidakelwa mina,ngicela nje lonke liphume endabeni zami." Kwakukhuluma uMandazi.
"Kwaze kwakubi ngoba lento eyenziwa nguMandazi ayifani laye kodwa sothini asimekeleni enjalo."Kwakukhuluma uNomathemba.
Basala bonke bebambe owangaphansi bezibuza ukuthi kwenzakalani ngoMandazi.
Wangena egumbini wazivalela walala uthe esejunywe yibuthongo aqala ukumfikela amaphupho ayehlukeneyo.
"Mama lo! Nansi inyoka ifuna ukungiluma mama ngisize mama ngoba izangiluma mama ngivikele ngingumtanakho yimina izibulo lakho lamantombazama."
"Inyoka iphuma phakathi kweqhaga likamama umbona ngilapha nguyena owangibulalayo, vikela abafowenu kanye labodadewenu ngoba loludiyo lulegazi lami kanye lezinanakazana eziyingozi ziphila ngegazi, bavikele Mandazi bakhangelele kuwe bonke."
"Mama ngithi izangiluma inyoka lina likhuluma ngani ngithi mama mama ngisize nanku iyeza kimi mama ngisize ngingafi mama ngifukamele njengesikhukhukazi esifukamela abamtwana baso mama buya ungangitshiyi.
"Ntandokazi yami izandla zami zibotshiwe angazi ngingakuvikela njani ngoba kimi kunzima, bayangibiza ekhaya ungangilandeli ngoba abafowenu basakudinga."
Kwakukhuluma uMandazi ephupha ekhuluma lonina owatshona besasebancane basala logogo wabo.
Ibhoda njalo inkombalanga izala amalanga, amalanga ezala amaviki, ngemva kwamaviki ambalwa.
Ngemva kweviki uMandazi wathatha isinqumo sokuthi uzaluthatha udiyo, wakwenza lokho esenzela ukuthi avikele abafowabo labodadewabo.
"Gogo sengisithethe isinqumo mina udiyo ngingaluthatha kodwa andubana ngiluthatha ngicela lingitshele ukuthi umama kwenzakalani ngaye andubana etshona lokuthi ubaba wami ungaphi ngoba ngiyafisa ukwazi imvelaphi kababa lomama?" Kwakubuza uMandazi.
"Yoooooh imbuzo engaka mina ngizayikwanisa umamakho into eyambulalayo yikuthi wenqaba ukunatha amaphilisi abantu bonke emtholampilo bazama ukukhuluma laye wenqaba, uyabona uyihlo vele wena waliyala lisasebencane unyoko wayehamba ezala lapha lalapha wayengakwazi ukuthi ayale umfana ngoba ethi umzimba womuntu wesifazana yithempeli lokukhonzela abesilisa wayevele ebavulele imlenze engabatsheli ukuthi begqoke ijazi lawe ungenza njalo uzakufa,ngoba ithuna lomuntu ongakwanisi ukuzubamba lisemnyango liyaqoqoda uzibambe ke ntombazana,nxa usafuna ukuphila emhlabeni."Kwakukhuluma uMakhumalo.
"Yoooooh hayi ngiyalizwa udiyo lwenu lusebenza njani ukuze lwehlise inhlanhla gogo kodwa vele lolu udiyo lulani phakathi kwamele ngiluvule andubana ngiluthatha ngoba mina angiyithathi imbuzi esesakeni." Kwakukhuluma uMandazi.

Obhalayo ngu S-K Indodakazi Yosizi eyakoMadabe.

Sk Indodakazi Yosizi

16/07/2026

15/07/2026

15/07/2026

13/07/2026

10/07/2026

Address

Website

Alerts

Shortcuts

Share

Category