https://www.facebook.com/1029201643611666/

IPRD Myeik News, myeik, Myeik (2026)

03/10/2026

ထားဝယ်ခရိုင်ရှိ သဘာဝဘေးသင့် ဒေသများတွင် ကယ်ဆယ်ရေးနှင့် ပြန်လည်ထူထောင်ရေး လုပ်ငန်းများ ကူညီဆောင်ရွက်ရန် စက်ယန္တရားယာဉ်များနှင့် ကျွမ်းကျင်လုပ်သားများ မြိတ်မှထားဝယ်သို့ ထွက်ခွာ

မြိတ် အောက်တိုဘာ ၃

တနင်္သာရီတိုင်းဒေသကြီး ထားဝယ်ခရိုင်တွင် စက်တင်ဘာလ စတုတ္ထအပတ်တွင် မိုးသည်းထန် စွာရွာသွန်း၍ ရေဘေးနှင့် မြေပြိုဘေးများ နေရာဒေသများတွင် ဖြစ်ပွားခဲ့ပြီး သဘာဝဘေးသင့် ဒေသ များတွင် ကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို စက်ယန္တရားများဖြင့် ကူညီဆောင် ရွက်နိုင်ရန်အတွက် စက်ယန္တရားယာဉ်(၁၉)စီးနှင့် ကျွမ်းကျင်လုပ်သားများသည် အောက်တိုဘာ(၃)ရက် ညနေပိုင်းက မြိတ်မှ ထားဝယ်သို့ ထွက်ခွာသွားကြသည်။

ထားဝယ်ခရိုင်အတွင်း ရေကြီးရေလျှံမှုနှင့် မြေပြိုမှုများကြောင့် ဘေးအန္တရာယ်ကျရောက်ခဲ့သည့် ပြည်သူများကို ကယ်ဆယ်ရေးလုပ်ငန်းများနှင့် ပြန်လည်ထူထောင်ရေးလုပ်ငန်းများကို တနင်္သာရီတိုင်း ဒေသကြီးအစိုးရအဖွဲ့ ဦးဆောင်မှုဖြင့် စက်ယန္တရားယာဉ်များဖြင့် အင်တိုက်အားတိုက် ထိထိရောက်ရောက် ဆောင်ရွက်ပေးရန် မြိတ်ခရိုင်ရှိ မြေတူးယာဉ်(၁၂)စီး၊ မြေကော်ယာဉ်(၃)စီး၊ ဆီဘောင်ဆာ(၁)စီး၊ သယ်ယူ ပို့ဆောင်ရေးယာဉ်(၁)စီး၊ မြေသယ်ယာဉ်(၁)စီး၊ အုပ်ချုပ်ထောက်ပံ့ယာဉ်(၁)စီးနှင့် ကျွမ်းကျင်လုပ်သား များ ပြည်ဖြိုးထွန်း(၉) ရေယာဉ်ဖြင့် သွားရောက်ခဲ့ကြသည်။

ထို့သို့ သဘာဝဘေးသင့် ဒေသများတွင် ကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ကို စက်ယန္တရားများဖြင့် ကူညီဆောင်ရွက်ရန် စက်ယန္တရားယာဉ်များ ရေယာဉ်ပေါ်သို့ တင်ဆောင်နေမှု အား မြိတ်ခရိုင်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးမျိုးဦး နှင့် တာဝန်ရှိသူများက ကြည့်ရှု အားပေးကြ၍ သွားရောက်ကူညီဆောင်ရွက်ကြမည့် စက်ယန္တရားယာဉ်မောင်းများ၊ ကျွမ်းကျင်လုပ်သား များနှင့် အုပ်ချုပ်သူများကို အားပေးစကားပြောကြားပြီး အသုံးစရိတ် ချီးမြှင့်ငွေများ ပေးအပ်ခဲ့ကြောင်း သိရသည်။

02/10/2026

မြိတ်မြို့နယ် အရန်မီးသတ်တပ်ဖွဲ့ဝင်များလေ့ကျင့်ရေး(မွမ်းမံ)သင်တန်း အမှတ်စဉ် (၁/၂ဝ၂၆) သင်တန်းဆင်းပွဲ ကျင်းပ

မြိတ် အောက်တိုဘာ ၂

တနင်္သာရီတိုင်းဒေသကြီး မြိတ်မြို့တွင် မီးဘေးကြိုတင်ကာကွယ်ရေး၊ မီးငြှိမ်းသတ်ရေး၊ ရှာဖွေ ကယ်ဆယ်ရေးလုပ်ငန်းများကို အရန်မီးသတ်တပ်ဖွဲ့ဝင်များ သိရှိနားလည်ပြီး သန္ဓေမီးသတ်တပ်ဖွဲဝင်များ နှင့်အတူ စနစ်တကျဖြင့် လုပ်ငန်းကျွမ်းကျင်စွာ ပူးပေါင်းဆောင်ရွက်နိုင်ရန်အတွက် မြိတ်ခရိုင်မီးသတ် စခန်းတွင် ဖွင့်လှစ်လျက်ရှိသော မြိတ်မြို့နယ် အရန် မီးသတ်တပ်ဖွဲ့ဝင်များ လေ့ကျင့်ရေး(မွမ်းမံ)သင်တန်း အမှတ်စဉ်(၁/၂၀၂၆)ကို အောက်တိုဘာ(၂)ရက် နံနက်ပိုင်းက သင်တန်းဆင်းပွဲ ကျင်းပသည်။

သင်တန်းဆင်းပွဲတွင် မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီအတွင်းရေးမှူး ရဲမှူး အေးဝင်း က သင်တန်းဆင်း အမှာစကားပြောကြားသည်။ ထို့နောက် မီးသတ်ပညာ(အဖွဲ့လိုက်)ပြိုင်ပွဲတွင် ပထမ၊ ဒုတိယနှင့်တတိယဆုများ၊ စစ်ရေးပြထူးချွန်ဆု၊ ဝတ်စားဆင်ယင်မှု အကောင်းဆုံးဆု၊ သင်တန်းဆင်း လက်မှတ်များ၊ သင်တန်းနည်းပြ ဂုဏ်ပြုဆုများကို မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီ အတွင်း ရေးမှူးနှင့် တာဝန်ရှိသူများက အသီးသီး ပေးအပ်ကြသည်။

အဆိုပါသင်တန်းကို ရက်သတ္တပတ်(၄)ပတ်ကြာဖွင့်လှစ်ခဲ့ပြီး သင်တန်းသား အရန်မီးသတ်တပ်ဖွဲ့ ဝင်(၁၀၀)ဦး တက်ရောက်ခဲ့ကြကာ သင်တန်းကာလအတွင်း မီးဘေးကြိုတင်ကာကွယ်ရေး၊ မီးငြှိမ်း သတ်ရေး၊ ရှာဖွေကယ်ဆယ်ရေး စသည့် ဘာသာရပ်များကို သင်ကြားလေ့ကျင့်ပေးခဲ့ကြောင်း သိရသည်။

02/10/2026

မြိတ်မြို့တွင် အဆင့်မြင့် အိမ်တွင်းမှုစက်ချုပ်သင်တန်း အမှတ်စဉ်(၁၂)သင်တန်း ဆင်းပွဲ ကျင်းပ

မြိတ် အောက်တိုဘာ ၂

နယ်စပ်ဒေသရှိ တိုင်းရင်းသူလေးများ၏ လူ့စွမ်းအားအရင်းအမြစ်များ ဖွံ့ဖြိုးတိုးတက်ပြီး လူမှုစီးပွားဘဝ မြှင့်တင်နိုင်စေရေး၊ စီးပွားရေးအထောက်အကူပြုအတတ်ပညာများဖြင့် အသက်မွေးဝမ်းကျောင်းပြုပြီး မိသားစု ဘဝ တိုးတက်မြင့်မားစေရေးအတွက် နယ်စပ်ရေးရာဝန်ကြီးဌာန ပညာရေးနှင့်လေ့ကျင့်ရေးဦးစီးဌာန မြိတ်မြို့ အမျိုးသမီးအိမ်တွင်းမှု သက်မွေးလုပ်ငန်းပညာသင်တန်းကျောင်းတွင် ဖွင့်လှစ်လျက်ရှိသော အဆင့်မြင့်အိမ်တွင်းမှု စက်ချုပ်သင်တန်း အမှတ်စဉ်(၁၂) သင်တန်းဆင်းပွဲကို ယနေ့ နံနက်ပိုင်းက ကျင်းပသည်။

သင်တန်းကို သင်တန်းကာလရက် သတ္တပတ်(၂၂)ပတ်ကြာဖွင့်လှစ်ခဲ့ပြီး သင်တန်းကာလအတွင်း သင် တန်းကျောင်းမှ သင်တန်းသူများအား ကလေးဝတ်ဘာသာရပ်၊ အမျိုးသားဝတ်ဘာသာရပ်၊ အမျိုးသမီး ခေတ်မီ ပုံဆန်းဘာသာရပ်၊ ဂျပန်စင်တီမီတာနည်းဖြင့် သတို့သမီးဝတ်စုံများ၊ ခေတ်ပေါ်ပုံဆန်းများကို သင်တန်းကျောင်းရှိ အပ်ချုပ်စက်၊ ဘီတင်စက်၊ ဒါးစက်၊ မော်တာအပ်ချုပ်စက်နှင့် ကွန်ပျူတာပန်းထိုးစက်များဖြင့် အခြေခံ သင်ခန်းစာ များ၊ အဆင့်မြင့်သင်ခန်းစာများ သင်ကြားပေးခဲ့သည်။

ထို့အတူ အိမ်တွင်းမှုဘာသာရပ်များဖြစ်သည့် လက်မှုဘာသာရပ်များ၊ ဟင်းလျာချက်ပြုတ်နည်း ဘာသာ ရပ်နှင့် မုန့်လုပ်နည်းဘာသာရပ်များကို စာတွေ့ လက်တွေ့ သင်ကြားပေးခဲ့ပြီး အသိပညာပေး ဟောပြောပွဲများ ပြုလုပ်ပေး၍ ပြည်ထောင်စုစိတ်ဓါတ် ဘာသာရပ်သင်ခန်းစာများနှင့် အဆင့်မြင့် ယဉ်ကျေးမှု ဘာသာရပ်များကို လည်း သင်ကြားပေးခဲ့ကာ သင်တန်းကို မြိတ်မြို့နယ်မှ(၁၃)ဦး၊ ကျွန်းစုမြို့နယ်မှ(၃)ဦးနှင့် တနင်္သာရီမြို့နယ်မှ (၅)ဦး၊ ပလောက်မြို့မှ(၁)ဦးနှင့် ဘုတ်ပြင်းမြို့နယ်မှ(၃)ဦး စုစုပေါင်းသင်တန်းသူ အမျိုးသမီးငယ်(၂၅)ဦး တက် ရောက်ခဲ့ကြသည်။

သင်တန်းဆင်းပွဲတွင် မြိတ်ခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌ ဦးမျိုးဦး က သင်တန်းဆင်း အမှာစကားပြောကြားပြီး သင်တန်းကျောင်း ကျောင်းအုပ် ဒေါ်စုမြတ်အေး က သင်တန်းနှင့်ပတ်သက်၍ ရှင်းလင်း ပြောကြားသည်။ ထို့နောက် သင်တန်းထူးချွန်ဆုများကို မြိတ်ခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌ နှင့် တာဝန်ရှိသူများက ဆုများအသီးသီးပေးအပ်ချီးမြှင့်ပြီး သင်တန်းကျောင်း ကျောင်းအုပ်မှ သင်တန်းဆင်းလက်မှတ် များ ပေးအပ်၍ သင်တန်းသူတစ်ဦးက ကျေးဇူးတင်စကား ပြန်လည်ပြောကြားသည်။

သင်တန်းဆင်းပွဲအပြီးတွင် သင်တန်းသူများ၏ သင်တန်းဆင်းလက်ရာများကို တက်ရောက်လာကြသူများ က ကြည့်ရှုအားပေးကြသည်။ သင်တန်းတက်ရောက်ကြသည့် သင်တန်းသူတစ်ဦးချင်းစီကို သင်တန်းကျောင်းမှ ပိတ်စ၊ သိုးမွှေး၊ စီလွန်များ၊ လက်မှုဘာသာရပ်ပစ္စည်းများနှင့် သင်တန်းသုံးပစ္စည်း (၃၈)မျိုးကို ထောက်ပံ့ပေးပြီး စားစရိတ်များလည်း ထောက်ပံ့ပေးသည့်အပြင် ရိုးရာဝတ်စုံ၊ တူညီဝတ်စုံများနှင့် အသွားအပြန် ခရီးစရိတ်များ ကိုလည်း ထောက်ပံ့ပေးကြောင်း သင်တန်းကျောင်းမှ သိရသည်။

01/10/2026

မြိတ်မြို့တွင် အပြည်ပြည်ဆိုင်ရာ သက်ကြီးပုဂ္ဂိုလ်များနေ့ (သက်ကြီးပူဇော်ပွဲ)ကျင်းပ

မြိတ် အောက်တိုဘာ ၁

၂၀၂၆ ခုနှစ် အောက်တိုဘာလ(၁)ရက်နေ့တွင် ကျရောက်သော အပြည်ပြည်ဆိုင်ရာ သက်ကြီး ပုဂ္ဂိုလ်များနေ့(သက်ကြီးပူဇော်ပွဲ)ကို “ သက်ရှည်ကျန်းမာ ခေတ်သစ်ဆီ စနစ်သစ်များဖြင့် လျှောက်လမ်း မည် ” ဆောင်ပုဒ်ဖြင့် မြိတ်ခရိုင်စီမံခန့်ခွဲရေးနှင့်အုပ်ချုပ်ရေးကော်မတီမှကြီးမှူး၍ မြိတ်မြို့ တောင်သာယာ ဘိုးဘွားရိပ်သာတွင် ယနေ့ နံနက်(၁၀)နာရီက အောင်ဘောဇနသုခခန်းမ၌ ကျင်းပသည်။

ပူဇော်ပွဲတွင် မြိတ်ခရိုင်စီမံခန့်ခွဲရေးနှင့်အုပ်ချုပ်ရေးကော်မတီ ဥက္ကဋ္ဌ ဦးမျိုးဦး က အပြည်ပြည် ဆိုင်ရာ သက်ကြီးရွယ်အိုများနေ့ (သက်ကြီးပူဇော်ပွဲ) ကျင်းပရခြင်းနှင့် ပတ်သက်၍ ရှင်းလင်းပြောကြားပြီး ကန်တော့ခံ ဘိုးဘွားများအား တက်ရောက်လာကြသူများက ကန်တော့ချိုးများဖြင့် ပူဇော်ကန်တော့ကြ သည်။ ထို့နောက် အသက်(၉၀)နှစ်နှင့်အထက်အတွက် ကန်တော့ငွေများကို ရပ်ကွက်/ကျေးရွာအုပ်ချုပ် ရေးမှူးများအား မြိတ်ခရိုင်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌနှင့် တာဝန်ရှိသူများက ပေးအပ်ကြ ပြီး ကန်တော့ခံဘိုးဘွားများအား ကန်တော့ပစ္စည်းများနှင့်ကန်တော့ငွေများဖြင့် လှူဒါန်းပေးအပ်ကြသည်။

ဆက်လက်၍ ကန်တော့ခံ ဘိုးဘွားများ ကိုယ်စား အဘိုး တစ်ဦးက ကျေးဇူးတင်ဩဝါဒစကားနှင့် ဆုတောင်း မေတ္တာပို့သသည်။ ပူဇော်ပွဲအပြီးတွင် ဘိုးဘွားများအား မြိတ်ပြည်သူ့ဆေးရုံမှ အထူးကု ဆရာဝန်များမှ ကျန်းမာရေး စစ်ဆေးကုသပေးသည်။ ပူဇော်ပွဲတွင် ဘိုးဘွားရိပ်သာမှ ကန်တော့ခံ ဘိုးဘွား (၆၄)ဦးအား အဝတ်တစ်စုံစီ၊ စားသောက်ဖွယ်ရာများ၊ ကန်တော့ငွေ(၅၀၀၀၀)ကျပ်စီနှင့် မြိတ်မြို့နယ် အတွင်းရှိ အသက်(၉၀)နှစ်နှင့် အထက် ဘိုးဘွား(၃၅၂)ဦး အား တစ်ဦးလျှင် ကန်တော့ငွေ(၅၀၀၀၀)ကျပ်စီ တာဝန်ရှိသူများက အိမ်တိုင်ရာရောက် သွားရောက် ကန်တော့ပေးအပ် ကြကြောင်း သိရသည်။

01/10/2026

မြိတ်မြို့တွင် (၆၂)နှစ်မြောက် မြန်မာနိုင်ငံရဲတပ်ဖွဲ့နေ့ အခမ်းအနားကျင်းပပြီး မှုခင်းများ စွမ်းစွမ်းတမံ ဖော်ထုတ်ဖမ်းဆီးခဲ့သော တပ်ဖွဲ့ဝင်များအား ဂုဏ်ပြု

မြိတ် အောက်တိုဘာ ၁

(၆၂)နှစ်မြောက် မြန်မာနိုင်ငံရဲတပ်ဖွဲ့‌နေ့အခမ်းအနားကို နိုင်ငံတဝှမ်းတွင် ကျင်းပလျက်ရှိရာ တနင်္သာ ရီတိုင်းဒေသကြီး မြိတ်မြို့၌ ပုလဲရတနာခန်းမတွင် ယနေ့ နံနက်(၉)နာရီက မြိတ်ခရိုင်ရဲတပ်ဖွဲ့မှ ကြီးမှူး ကျင်းပခဲ့ပြီး မှုခင်းများ စွမ်းစွမ်းတမံဖော်ထုတ်ဖမ်းဆီးခဲ့သော ရဲတပ်ဖွဲ့ဝင်များအား ဂုဏ်ပြုချီးမြှင့်သည်။

မြိတ်ခရိုင်တွင် (၂၀၂၅)ခုနှစ် အောက်တိုဘာ(၂)ရက်မှ (၂၀၂၆)ခုနှစ် စက်တင်ဘာ(၃၀)ရက်အထိ မူးယစ်ဆေးဝါးဖမ်းဆီးရမိမှုအနေဖြင့် မူးယစ်ဆေးဝါး အမှုပေါင်း(၁၀၇)မှု၊ တရားခံ(၁၇၆)ဦး ဖမ်းဆီးရမိခဲ့ ကြောင်း၊ ထို့အပြင် တရားမဝင်ကုန်ပစ္စည်း ဖမ်းဆီးရမိမှု(၂)မှု၊ တရားမဝင် ခဲမဖြူ သတ္တုဖမ်းဆီးရမိမှု (၁)မှုတို့ကို ရဲတပ်ဖွဲ့ဝင်များမှ ဖော်ထုတ် ဖမ်းဆီးအရေးယူနိုင်ခဲ့သည်။

အခမ်းအနားတွင် မြိတ်ခရိုင်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဋ္ဌ ဦးမျိုးဦး က မြန်မာနိုင်ငံ ရဲတပ်ဖွဲ့နေ့ ဂုဏ်ပြုအမှာစကားပြောကြားပြီး ရဲချုပ်ထံမှပေးပို့သော (၆၂)နှစ်မြောက် မြန်မာနိုင်ငံရဲတပ်ဖွဲ့ နေ့ သဝဏ်လွှာအား မြိတ်ခရိုင် ရဲတပ်ဖွဲ့မှူး ဒုတိယရဲမှူးကြီး သန်းနု က ဖတ်ကြားသည်။ ထို့နောက် မှုခင်းများ စွမ်းစွမ်းတမံ ဖော်ထုတ်ဖမ်းဆီးခဲ့သော ရဲအရာရှိများ၊ အခြားအဆင့်တပ်ဖွဲ့ဝင်များနှင့် ပူးပေါင်း ပါဝင်ဆောင်ရွက်ခဲ့ကြသူများအား ကမ်းရိုးတန်းဒေသတိုင်းစစ်ဌာနချုပ် တိုင်းမှူး ဗိုလ်ချုပ်ကျော်ကျော်ဟန် နှင့် တာဝန်ရှိသူများက ဂုဏ်ပြုဆုများ အသီးသီးပေးအပ်ချီးမြှင့်ကြသည်။

ဆက်လက်၍ ရဲတပ်ဖွဲ့နေ့အထိမ်းအမှတ် Video Clip ပြသရာ တက်ရောက်လာကြသူများက ကြည့်ရှုခဲ့ကြပြီး အခမ်းအနားအပြီး၌ ခန်းမအတွင်းပြသထားသည့် (၆၂)နှစ်မြောက် မြန်မာနိုင်ငံရဲတပ်ဖွဲ့ နှစ်ပတ်လည် နေ့အထိမ်းအမှတ် ပညာပေးပြခန်းအား တက်ရောက်လာကြသူများက ကြည့်ရှုအားပေး ခဲ့ကြကြောင်း သိရသည်။

01/10/2026

အယ်လ်နီညိုနှင့် တောင်သူဦးကြီးတို့၏ လယ်ကွင်းများ

အေးမြင့်ဆွေ (ဆည်/ရေ)

“မောင်ထွန်းရေ၊ မင်းသိပြီးပြီလား..။ ဒီနှစ် ဘာ…ညိုကြောင့်ဆိုလား ရာသီဥတုဖောက်ပြန်မှာမို့ ကြိုတင်ပြင်ဆင်ရမယ်ဆိုကွ..။ အဲဒီအကြောင်းသိရင် ငါ့ကို မင်းသိသလောက်လေး ပြောပြစမ်းပါကွာ” အညာကုက္ကိုပင်ရိပ်အောက် ဝါးခုံတန်းလျားတွင် ရေနွေးသောက်နေရင်းမှ လယ်သမားကြီး ဘကြီးအောင်သည် မြေးဖြစ်သူအား ကောက်ကာငင်ကာ မေးခွန်းထုတ်လိုက်၏။ မွေးကတည်းက လယ်ယာထဲတွင် ကြီးပြင်းကာ သီးနှံအမျိုးမျိုးကိုစိုက်၍ စားဝတ်နေရေး ဖြေရှင်းခဲ့ရသော ဘကြီးအောင်သည် ရာသီဥတုနှင့်ပတ်သက်သော သတင်းများကြားလျှင် စိတ်ဝင်တစား နားစွင့်လေ့ရှိပါသည်။

“အယ်လ်နီညိုပါ အဘရယ်..။ အဘပြောမှပဲ ဘာ..ညို ဖြစ်တော့တယ်ဗျာ။ အဲဒါက နည်းနည်းတော့ ရှုပ်တယ်အဘရဲ့။ ပင်လယ်ထဲမှာ အပူချိန်တွေမြင့်တာကစပြီး ရာသီဥတုကို ဖောက်ပြန်စေတဲ့ ဖြစ်စဉ်တဲ့ဗျ။ မိုးရာသီကာလ တိုတာတို့၊ မိုးရွာချိန် ပုံမမှန်တာတို့၊ မိုးရွာနည်းပြီး ပူပြင်းတာတို့ ဖြစ်တာလို့ပြောကြတာပဲ။ တစ်ခါတလေလဲ ခဏအတွင်း မိုးတွေအလွန်ကြီးပြီး ရေကြီးတာတွေဖြစ်တတ်တယ်တဲ့။ ဒီနှစ်ကမ္ဘာတစ်ဝန်းမှာ ရေတွေအလွန်ကြီးနေတာ အဲဒါကြောင့်လဲ ပါမယ်ထင်တယ် အဘရဲ့။ အဓိကကတော့ ရာသီဥတု ကမောက်ကမ ဖောက်လွဲဖောက်ပြန် ဖြစ်တာပေါ့ဗျာ..။ ထပ်အရှင်းဆုံးပြောရရင်တော့ ဒီနှစ်ဆောင်းနဲ့ နွေကတော့ ခါတိုင်းထက်ပိုပူမှာပေါ့ အဘရာ။”

“ဟုတ်ရော ဟုတ်ရဲ့လားကွာ..။ ဘယ်လိုလုပ်သိကြတာလဲ..”

“အခုခေတ်က ခေတ်မီနည်းလမ်းတွေနဲ့ ကြိုသိကြတာ အဘရဲ့။ ပြီးတော့ ကမ္ဘာ့မိုးလေဝသအဖွဲ့ချုပ်ဆိုတာကလဲ တစ်ကမ္ဘာလုံးကို ကြိုတင်ပြင်ဆင်ဖို့ သတိပေးထားတာတဲ့။ ကျွန်တော်တို့ တစ်နိုင်ငံတည်းတင်တော့မဟုတ်ဘူး။ အခြားနိုင်ငံတွေရော ကြိုတင်ပြင်ဆင်နေကြရတာဗျ။ သောက်သုံးရေ စုဆောင်းဖို့၊ ချွေတာဖို့၊ စိုက်ပျိုးရေတွေ သေချာစိစစ်သုံးဖို့၊ ရေတွင်းရေကန်တွေမှာ ရေစုဆောင်းထားဖို့ စတာတွေပေါ့ဗျာ။ ရေရှိမှ သောက်ရေ၊ သုံးရေအဆင်ပြေသလို စိုက်ပျိုးရေရှိမှ စားရေရိက္ခာသီးနှံတွေ စိုက်ပျိုးလို့ရမှာလေဗျာ…”

ကွမ်းသီးကို အားစိုက်၍ ညှပ်နေသော်လည်း ဘကြီးအောင်၏ အတွေးထဲသို့ မောင်ထွန်း၏ စကားလုံးတိုင်းက စီစီရီရီဝင်ရောက်သွားကာ “ဒီလိုဆိုရင်တော့ ရွာဦးဘုန်းကြီးကျောင်းနားက ရေကန်ကြီးကို သေချာသွားစစ်ပြီး ချုံနွယ်ပိတ်ပေါင်းရှင်းတာတွေ၊ ကန်ပေါင်ဆင့်တာတွေ ကြိုလုပ်ထားဦးမှ၊ စနစ်တကျရေခပ်ဖို့၊ ရေသုံးဖို့ ရပ်ရွာထဲလှည့်ပြောထားဦးမှ” ဟု ရပ်မိရပ်ဖပီပီ တွေးတောမိသွားပြန်သည်။

“သောက်သုံးရေတော့ မလုံလောက်ရင် ရွာဦးကန်ကို အားကိုးရမကွဲ့…။ လယ်တွေအတွက်ကရော ရေလုံလောက်ပါ့မလား။ ငါ့လယ်တွေက ဆည်ရေသောက်တွေကွ..”

“ဆည်တွေမှာလဲ ကြိုတင်ပြင်ဆင်ပြီးတော့ ရေသိုလှောင်ထားမှာပေါ့ အဘရာ..၊ ဒါပေမယ့် ပိုပူလာရင် စပါးပင်ကလဲ ရေပိုလိုလာမှာ။ အငွေ့ပြန်တာတွေ ဘာတွေလဲများလာတာပေါ့။ အဲဒီတော့ရေကို ဂရုတစိုက်လေး စိစစ်သုံးသင့်တယ်။ လယ်ကန်သင်းတွေလဲ ရေလုံအောင် သေချာဖို့ပြီး ကြွက်တွင်းတွေ၊ ပုစွန်တွင်းတွေစစ်ရမယ် အဘရဲ့။ မလိုအပ်ဘဲ ရေတွေကြိုသွင်းထားတာမျိုးမလုပ်ဘဲ ရေကိုလိုသလောက်ပဲသွင်းပြီး အခြားသူတွေနဲ့ မျှဝေသုံးရမှာပေါ့။ အဘလယ်တွေက ကွက်ဆင့်သောက်မြောင်းရင်းဆိုတော့ သိပ်စိတ်မပူရပေမယ့် မြောင်းဖျားက လူတွေအတွက်လဲ စဉ်းစားပေးရမှာပေါ့ အဘ။ အလှည့်ကျ မျှမျှတတသုံးရမယ် အဘရဲ့။ ကိုယ့်လယ်ရေရပြီးရော မြောင်းကို သဲအိတ်တားတာတို့၊ မြောင်းပေါင်ချိုးတာတွေတို့ မလုပ်သင့်ဘူးပေါ့ဗျာ…။”

“အေးပါကွာ..မင်းပြောပုံက ငါကပဲ ရေကို ညစ်ထားသလိုလို ဘာလိုလို။ အဲဒီလို မြောင်းပေါင်တွေချိုးရင်၊ သဲအိတ်တွေဆင့်ရင် တာတမံဥပဒေဆိုတာနဲ့ အရေးယူလို့ရတယ်လို့ ဆည်မြောင်းက ဦးစီးအရာရှိဆိုတာက ရှင်းပြထားလို့ တို့လယ်တစ်ကွင်းလုံး သိပါတယ်ကွာ..။ မလုပ်ရဲသလို လုပ်လဲမလုပ်ချင်ပါဘူး။ မြောင်းဖျားကလူတွေ ရေရလား အဆင်ပြေလား အမြဲမေးတာပါကွ…။ ရေအသုံးချမှုအဖွဲ့ဆိုတာမှာလဲ ဝင်ပြီးလုပ်နေတာပါ။ လယ်ကြားမြောင်းတွေ ဘာတွေလဲ အမြဲလူစုပြီး သူ့အုပ်စုနဲ့သူ ရှင်းနေကျ၊ ဖော်နေကျ။ ငါတို့လယ်တွေအတွက် ရေလုံလုံလောက်လောက်ရရင်ကို ငါ့မှာပျော်လို့ဟေ့။ အထွက်တိုးရင်တော့ ထီပေါက်သလို ပျော်တာပေါ့ကွာ။ အယ်လ်နီညိုအတွင်း မထိခိုက်ရအောင် ရေဘယ်လိုချွေသင့်သလဲ၊ ဘယ်လိုတွေစိုက်သင့်သလဲ၊ ဘယ်လိုတွေလုပ်ရမလဲ အကုန်လုပ်ရမယ်ဟေ့” ဘကြီးအောင်၏ အားကြိုးမာန်တက် မျှော်လင့်ချက်အသံသည် အိမ်ဘေးစပါးခင်းများဆီမှ ဖြတ်တိုက်လာသော လေနှင့်အတူ တက်ကြွနေ၏။ အမှန်တကယ်တွင်လည်း တောင်သူဦးကြီးတို့အတွက် သီးနှံဝင်ငွေက မိသားစုစားဝတ်နေရေးအတွက် အလွန်ပင်အရေးကြီးလှသည်ဖြစ်ရာ စိုက်ပျိုးရေရရှိရေးသည် အလွန်အရေးကြီးပါသည်။

“ဟုတ်ပါပြီ အဘရယ်..။ တစ်ခုရှိသေးတယ်ဗျ..။ တကယ်လို့ စနစ်တကျတွက်ချက်ပြီး ဒီနှစ်တော့ စပါးအစား မတ်ပဲ၊ နှမ်းစတဲ့ ရေနည်းလိုသီးနှံတွေပြောင်းစိုက်သင့်တယ်လို့ ဌာနဆိုင်ရာတွေက အကြံပေးရင်လဲ ပူးပေါင်းဆောင်ရွက်သင့်တယ် အဘရဲ့။ ရာသီဥတုပူပြင်းရင် တချို့ကွင်းတွေမှာ ရေနည်းလိုသီးနှံက ပိုသင့်တော်တယ်လို့ ပြောကြတယ်။ ဒါပေမယ့် လူညီဖို့တော့ လိုတာပေါ့ဗျာ။ တစ်ယောက်က စပါးစိုက်ချင်ပြီး တစ်ယောက်က နွေနှမ်းစိုက်ချင်လို့လဲ မဖြစ်သေးဘူးဗျ။”
“ဟုတ်တယ် လူညီဖို့တော့ လိုတယ်ကွ။ မဟုတ်ရင် စပါးကြား နွေနှမ်းစိုက်လို့ကတော့ ရိုးတံရေပုပ်ပြီး သေသွားမှာပေါ့။ မတ်ပဲတွေ ဘာတွေလဲ အတူတူပေါ့ကွာ။ ဒါနဲ့ ကြက်သွန်တို့၊ ဘာတို့ မီးဖိုချောင်သီးနှံတွေအတွက်ရော ရေဘယ်လိုစိစစ်သုံးသင့်သလဲသိရင် ပြောစမ်းပါကွာ…။ ငါ့ရွာနားက အကွက်တွေက နှစ်တိုင်း အဲဒါတွေစိုက်ရတာ..။ စပါးက ထမင်းဖိုးဆို အဲဒီလို သီးနှံလေးတွေကရတဲ့ဝင်ငွေက လှူလို့တန်းလို့ရသကွ။”

ဘကြီးအောင်ပြောသည်မှာ အမှန်ပင်။ စပါး၊ နှမ်းစသည့် ရာသီသီးနှံတို့မပေါ်သေးမီ ကြားကာလတွင် ခရမ်းချဉ်၊ ဂေါ်ဖီ၊ ပဲတောင့်ရှည်၊ ကြက်သွန်နီ၊ နံနံပင်စသည့် မီးဖိုချောင်သီးနှံများကလည်း ကျေးလက်ဒေသဝင်ငွေအတွက် အလွန်ပင်အရေးကြီးပါသည်။ ထိုသီးနှံတို့အားသာချက်မှာ မိမိတို့ခြံဝင်းအတွင်းတွင်လည်း တစ်နိုင်တစ်ပိုင် စိုက်ပျိုးနိုင်ပါသည်။

“ကြက်သွန်တို့ ခရမ်းချဉ်တို့လား..။ လိုတဲ့ရေရအောင်တော့ အခုမိုးမကုန်သေးခင်ကတည်းက အခင်းနားမှာ ရေကန်ငယ်လေးတွေ တူးထားနိုင်ရင်တော့ ပိုကောင်းတာပေါ့အဘရာ။ လျှိုပိတ်ရေကန်လေးတွေလိုပေါ့။ အဝီစိရေကတော့ လိုအပ်လွန်းမှ သုံးသင့်တာ အဘရဲ့။ မြေအောက်ရေဆိုတာကလဲ မြေပေါ်ရေလိုပဲ စိစစ်သုံးရမှာ။ ကြက်သွန်ကတော့ ရေပိုလိုမယ်ထင်တယ်နော် အဘ။ ခါတိုင်းလို နေ့တိုင်းရေမလောင်းဘဲ အလှည့်ကျ ရေသွင်းစိုက်လို့လဲရတယ်။ လူလဲသက်သာ ရေလဲသက်သာပေါ့ဗျာ။ ပြီးတော့ ပိုက်လေးတွေတန်းပြီး ရေဖျန်းစနစ်နဲ့စိုက်ရင်လဲ ရေသက်သာတယ်။ တချို့နေရာတွေမှာ အပင်အမြစ်လေးတွေနားမှာ ရေဘူးလေးတွေနဲ့ ရေစက်ချစနစ်နဲ့လဲ စိုက်ကြတယ်။”

“မင်းဟာကလဲ အစက်ချရုံနဲ့ အပင်က ကြီးနိုင်ပါ့မလားကွာ..”

“ကြီးတယ်ပြောတာပဲ အဘရဲ့။ အစ္စရေးနိုင်ငံဆိုရင် ကန္တာရထဲမှာ အဲဒီလိုနည်းတွေနဲ့ ရေချွေတာစိုက်ပြီး သစ်သီးဝလံတွေ အခြားနိုင်ငံတွေတောင် ရောင်းနိုင်သေးတာတဲ့။ အဘနည်းလမ်းသိချင်ရင် ကျွန်တော်ရှာပေးရမလား..”။

ဘကြီးအောင်သည် မြေးဖြစ်သူစကားအား ယုံတစ်ဝက်၊ မယုံတစ်ဝက်ဖြစ်သောကြောင့် နှုတ်ဆိတ်၍ ခပ်တိတ်တိတ်နေ၏။ သို့သော် မြို့ကျောင်းသား မြေးဖြစ်သူနှင့် ဒီနေ့စကားပြောရသည်မှာ အကျိုးရှိသည်ဟု စိတ်ထဲတွင်ယူဆ၍ အလွန်ပီတိဖြစ်လျက်ရှိပါသည်။ ယခုကဲ့သို့ မိမိသိသည်များအား လယ်နီးနားချင်း လုပ်ဖော်ကိုင်ဖက် အပေါင်းအသင်းများအားလည်း ပြောပြထားသင့်သည်ဟု တွေးမိကာအနီးမှ ဝါးခမောက်ကို ကောက်ဆောင်း၍ ရွာထဲသို့သွားရန် ချက်ချင်းပြင်တော့သည်။

“ရွာထဲ သွားလိုက်ဦးမယ်ဟေ့။ လိုတာလေးတွေ ပြောပြရအောင်။ မင်းပြောတဲ့ ဘာ..ညို…”

“အယ်လ်နီညိုပါဗျာ.. အဘကလဲ... အခုကတည်းက မေ့နေပြီလား…”

“ခေါင်းစဉ်ပဲမေ့တာပါကွာ။ ကျန်တာ ငါအကုန်မှတ်မိပါတယ်…”

ဘကြီးအောင်သည် အယ်လ်နီညိုကို ဖြတ်ကျော်ဖို့ ပြင်ဆင်ရန် တက်ကြွလျက်ရှိပါ‌သည်။ ။

https://t.me/myanmarnewspaper/243028

MOI News Application အား အောက်ပါ link တွင် Download ပြုလုပ်နိုင်ပါသည်-

For Andriod
https://shorturl.at/uK23k

For IOS
https://rb.gy/vgdhqc

Subscribe to Myanmar Newspaper
https://t.me/myanmarnewspaper

Subscribe to The Global New Light of Myanmar
https://t.me/gnlmon

Subscribe to MOI
https://t.me/iprdrnd

View to mTube Video Streaming Platform
https://mtube.gov.mm

01/10/2026

ဂုဏ်ကျေးဇူးများကိုလေးစားဂရုပြု သက်ကြီးပုဂ္ဂိုလ်များကိုစောင့်ရှောက်

လူ့ဘောင်လောက လူ့အသိုက်အဝန်းတို့ကို အကျိုးကျေးဇူးပြုနိုင်သည့် အသိပညာ၊ အတတ်ပညာများကို အသက်အရွယ်မရွေး ဆည်းပူးလေ့လာနိုင်သည်၊၊ လူ့ဘောင်လောက လူ့အသိုက်အဝန်းကို အကျိုးကျေးဇူးပြုနိုင်သည့် အတွေ့အကြုံဗဟုသုတများကိုမူ အသက်အရွယ်ငယ်ရွယ်သူများထက် အသက်အရွယ်ကြီးရင့်သူ သက်ကြီးရွယ်အိုပုဂ္ဂိုလ်များက ပိုမိုအကျိုးကျေးဇူးပြုနိုင်ပေသည်။ အတွေ့အကြုံဗဟုသုတများသည် ဖြတ်သန်းခဲ့သောဘဝခရီးလမ်း ရှည်ကြာသည်နှင့်အမျှ ရရှိခဲ့သောအကျိုးရလဒ်များ များစွာရှိသည်။ ထို့ကြောင့် သက်ကြီးရွယ်အိုပုဂ္ဂိုလ်များ၏ ဂုဏ်ကျေးဇူးကို လေးစားရိုသေ အသိအမှတ်ပြုကြရမည်ဖြစ်သည်။

အတိတ်ကာလများစွာက မိမိတို့၏လူမှုဘဝနှင့် အသိုက်အဝန်းကို အကျိုးပြုခဲ့ကြသူများသည် သက်ကြီးရွယ်အိုဘဝသို့ရောက်သည့်အခါ အထီးကျန်ဆန်သော ဘဝများ၊ တန်းတူရည်တူ မစွမ်းဆောင်နိုင်သောဘဝများမှ အပယ်ခံဘဝများ၊ စွန့်ပစ်ခံဘဝများသို့ ရောက်ကြရသည်။ ထို့ကြောင့် အစိုးရအဖွဲ့အစည်းများနှင့် လူမှုကူညီရေးအဖွဲ့အစည်းများက ဘိုးဘွားရိပ်သာကဲ့သို့ သက်ကြီးရွယ်အို စောင့်ရှောက်ရေးလုပ်ငန်းများကို တာဝန်ယူဆောင်ရွက်ပေးလာကြသည်။ အာဆီယံနိုင်ငံများနှင့် အရှေ့အာရှနိုင်ငံများတွင် သက်ကြီးရွယ်အိုပုဂ္ဂိုလ်များအား အိမ်အရောက်စောင့်ရှောက်ခြင်း၊ မိသားစုအခြေပြုစောင့်ရှောက်ခြင်း၊ ဂေဟာငယ်များ တည်ထောင်စောင့်ရှောက်ခြင်း၊ နေ့ပိုင်းစောင့်ရှောက်ရေးဂေဟာဖွင့်လှစ်ခြင်း၊ စေတနာ့ဝန်ထမ်းဘိုးဘွားရိပ်သာများ တည်ထောင်ဖွင့်လှစ်ခြင်းတို့ဖြင့် ကာကွယ်စောင့်ရှောက်ပေးလျက်ရှိသည်။

မြန်မာနိုင်ငံတွင် အစောပိုင်းကတည်းက ခိုကိုးရာမဲ့၊ အားကိုးရာမဲ့သည့် သက်ကြီးရွယ်အိုများကို စေတနာ့ဝန်ထမ်းဘိုးဘွားရိပ်သာများ ဖွင့်လှစ်ပြီး စောင့်ရှောက်ပေးခဲ့သည်။ ယခုအခါ လူမှုဝန်ထမ်းဦးစီးဌာန၏ တည်ထောင်ခွင့်ပြုမိန့်ရ ဘိုးဘွားရိပ်သာပေါင်း ၉၄ ခုရှိသည်။ မြန်မာနိုင်ငံတွင် လူမှုကာကွယ်စောင့်ရှောက်ရေး အမျိုးသားအဆင့်မဟာဗျူဟာစီမံချက်အရ “သက်ကြီးလူမှုရေးပင်စင်ထောက်ပံ့ရေးအစီအစဉ်” ကို ၂၀၁၇-၂၀၁၈ ဘဏ္ဍာရေးနှစ်မှစတင်၍ အကောင်အထည်ဖော်ဆောင်ရွက်ခဲ့သည်။ ၁၉၄၁ ခုနှစ် ဧပြီလ ၁ ရက်မတိုင်မီ မွေးဖွားခဲ့သည့် အသက် ၈၅ နှစ်ပြည့်ပြီးသော သက်ကြီးပုဂ္ဂိုလ်များအတွက် ၂၀၂၆-၂၀၂၇ ဘဏ္ဍာရေးနှစ် သုံးလပတ် နှစ်ကြိမ် ခြောက်လစာ ထောက်ပံ့ခြင်းကို ကိုယ်တိုင် သို့မဟုတ် ကိုယ်စားလှယ်၏ဖုန်းထဲသို့ ငွေလွှဲခြင်းနည်းလမ်းဖြင့် ဆောင်ရွက်ပေးမည်ဟု သိရသည်။ ထို့အပြင် အသက်ကြီးသူများကိုယ်တိုင်ဦးဆောင်၍ ထိခိုက်လွယ်အုပ်စုဖြစ်သည့် မသန်စွမ်းသူများ၊ အမျိုးသမီးများဖြင့် ရပ်ရွာအခြေပြု အသက်ကြီးသူချင်း ကူညီစောင့်ရှောက်ရေးအဖွဲ့ ၃၆၈ ဖွဲ့ကို ရေရှည်ရပ်တည်နိုင်ရေးအတွက် မတည်ရန်ပုံငွေများ ထုတ်ပေးလျက်ရှိသည်ဟုသိရသည်။

ယခုအခါ မြန်မာနိုင်ငံအပါအဝင် ကမ္ဘာပေါ်ရှိနိုင်ငံများ၌ သက်ကြီးရွယ်အို အုပ်စုဝင်များ ပိုမိုများပြားလာသည်ကို တွေ့ရသည်။ အသက် ၁၂၀ ကျော်အထိ အသက်ရှည်လာသည့် သက်ကြီးပုဂ္ဂိုလ်များရှိလာပြီး မကြာသေးမီက မြန်မာနိုင်ငံအတွင်း အသက် ၁၂၀ ကျော်ရှည်သည့် ဘိုးဘွားများအား ဒေသဆိုင်ရာအစိုးရအဖွဲ့များက ထောက်ပံ့ကူညီခဲ့သည်ကို တွေ့ရသည်။ မြန်မာနိုင်ငံတွင် သက်ကြီးရွယ်အိုပုဂ္ဂိုလ်များ ကာကွယ်စောင့်ရှောက်ရေးကို ရှေ့ဆောင်ရှေ့ရွက်ပြုနိုင်ရန် လူမှုကာကွယ်စောင့်ရှောက်ရေးဆိုင်ရာ အမျိုးသားကော်မတီနှင့် မြန်မာနိုင်ငံ သက်ကြီးရွယ်အိုများဆိုင်ရာကော်မတီတို့ကို ပြန်လည်ဖွဲ့စည်းထားသည်။ တတိယအကြိမ် ပြည်သူ့လွှတ်တော်နှင့် အမျိုးသားလွှတ်တော်တို့တွင်လည်း လူငယ်၊ အမျိုးသမီး၊ ကလေးသူငယ်နှင့် သက်ကြီးရွယ်အို အခွင့်အရေးဆိုင်ရာကော်မတီကို ဖွဲ့စည်းထားပြီး ကာကွယ်စောင့်ရှောက်ပေးလျက်ရှိသည်။ ၂၀၁၆ ခုနှစ် သက်ကြီးရွယ်အိုများဆိုင်ရာ ဥပဒေတွင် သက်ကြီးရွယ်အိုများ၏ အခွင့်အရေးများကို ပြဋ္ဌာန်းထားသည်။ ၂၀၂၂ ခုနှစ် သက်ကြီးရွယ်အိုများဆိုင်ရာ နည်းဥပဒေတွင် သက်ကြီးရွယ်အို သက်သေခံကတ်ပြားရရှိထားသော သက်ကြီးရွယ်အိုများသည်သာ ဥပဒေအရ သက်သာ ချောင်ချိခွင့် အခွင့်အရေးများ ခံစားခွင့်ရှိသည်ဟု ပြဋ္ဌာန်းထားသည်။
ကမ္ဘာတစ်ဝန်းတွင် သက်ကြီးရွယ်အိုဘိုးဘွားများ များပြားလာမှုသည် လူ့အသိုက်အဝန်းတစ်ခုလုံးအတွက် ထူးခြားသောပြောင်းလဲမှုတစ်ရပ်ဟု မှတ်ယူရမည်ဖြစ်သည်။ လူ့သက်တမ်းပိုရှည်လာခြင်းသည် ယခင်က မရှိခဲ့ဖူးသောအခွင့်အလမ်းများစွာ ဖန်တီးပေးနိုင်ရန်ဖြစ်သော်လည်း ယခုအခါ ကျန်းမာရေးစနစ်များ၊ အလုပ်အကိုင်အခွင့်အလမ်းများ၊ လူမှုကာကွယ်စောင့်ရှောက်ရေး၊ ပညာရေး၊ အိုးအိမ်နှင့် ပြည်သူ့ရေးရာမူဝါဒစသည်တို့သည် လူ့သက်တမ်းတစ်လျှောက် မည်သို့မည်ပုံအရေးပါလာသည်ကို စဉ်းစားသုံးသပ်ရန်လိုအပ်လာသည်။ ယခု ၂၀၂၆ ခုနှစ် အပြည်ပြည်ဆိုင်ရာ သက်ကြီးပုဂ္ဂိုလ်များနေ့အတွက် ချမှတ်ထားသော “သက်ရှည် ကျန်းမာခေတ်သစ်ဆီ စနစ်သစ်များဖြင့် လျှောက်လှမ်းမည်”ဆောင်ပုဒ်နှင့်အညီ တိုးတက်လာသော သက်ကြီးရွယ်အိုပုဂ္ဂိုလ်များ ကာကွယ်စောင့်ရှောက်ရေး လုပ်ငန်းစဉ်များကို အစိုးရ၊ အစိုးရမဟုတ်သောအဖွဲ့အစည်းများ၊ စေတနာရှင်များ ပူးပေါင်း၍ ပိုမိုမြှင့်တင် စောင့်ရှောက်ပေးရမည်ဖြစ်ပါကြောင်း။ ။

https://t.me/myanmarnewspaper/242973

MOI News Application အား အောက်ပါ link တွင် Download ပြုလုပ်နိုင်ပါသည်-

For Andriod
https://shorturl.at/uK23k

For IOS
https://rb.gy/vgdhqc

Subscribe to Myanmar Newspaper
https://t.me/myanmarnewspaper

Subscribe to The Global New Light of Myanmar
https://t.me/gnlmon

Subscribe to MOI
https://t.me/iprdrnd

View to mTube Video Streaming Platform
https://mtube.gov.mm

01/10/2026

ပြည်သူက အထင်ကြီးလေးစားပြီး ဂုဏ်ယူအားကိုးရသည့် ရဲတပ်ဖွဲ့ ဖြစ်ရေး

မြန်မာနိုင်ငံကို ဗြိတိသျှတို့ ကျူးကျော်သိမ်းပိုက်ပြီးနောက် အရပ်ဘက်အုပ်ချုပ်ရေးနှင့် တရားဥပဒေစိုးမိုးရေးအတွက် ဗြိတိသျှရဲစနစ် (British Policing System) ကို စတင်မိတ်ဆက်ခဲ့သည်။ ၁၈၆၁ ခုနှစ်တွင် ကိုလိုနီရဲအဖွဲ့ကို စတင်တည်ထောင်ခဲ့ရာ ထိုစဉ်က ပြည်သူများက ပုလိပ်အဖွဲ့ဟုခေါ်ခဲ့ကြသည်။ ၁၈၈၅ ခုနှစ်တွင် မြန်မာတစ်နိုင်ငံလုံး ဗြိတိသျှလက်အောက်သို့ လုံးဝကျရောက်သွားခဲ့ပြီးနောက် တစ်နိုင်ငံလုံး အတိုင်းအတာဖြင့် Burma Police အဖြစ် တိုးချဲ့ဖွဲ့စည်းခဲ့ပြီး ကိုလိုနီအုပ်ချုပ်ရေး၏ယန္တရားအဖြစ် အသုံးချခဲ့သည်။

၁၉၄၈ ခုနှစ် မြန်မာနိုင်ငံ လွတ်လပ်ရေးရရှိပြီးနောက်တွင်လည်း ကိုလိုနီခေတ်က ကျန်ရစ်ခဲ့သည့် Burma Police ဖွဲ့စည်းပုံစနစ်ဖြင့် ဆက်လက်လည်ပတ်ခဲ့ရာ ၁၉၆၄ ခုနှစ် အောက်တိုဘာလ ၁ ရက်နေ့တွင် တော်လှန်ရေးကောင်စီအစိုးရက ‘‘ပြည်သူ့ရဲတပ်ဖွဲ့’’အဖြစ် ပြောင်းလဲပြင်ဆင်ဖွဲ့စည်းခဲ့ချိန်မှစ၍ ကိုလိုနီစနစ်ဆန်သော အမည်နှင့် ဖွဲ့စည်းပုံတို့ ချုပ်ငြိမ်းသွားခဲ့သလို ရဲတပ်ဖွဲ့နေ့အဖြစ်လည်း စတင်သတ်မှတ်ခဲ့သည်။ ၁၉၉၅ ခုနှစ် အောက်တိုဘာလ ၁ ရက်နေ့တွင် ပြည်သူ့ရဲတပ်ဖွဲ့ကို ‘‘မြန်မာနိုင်ငံရဲတပ်ဖွဲ့’’ ဟူ၍ ပြင်ဆင်ဖွဲ့စည်းခဲ့ရာ ယခုအခါ (၆၂) နှစ်မြောက် မြန်မာနိုင်ငံရဲတပ်ဖွဲ့နေ့ အခါသမယသို့ ရောက်ရှိခဲ့ပြီဖြစ်သည်။

မြန်မာနိုင်ငံရဲတပ်ဖွဲ့သည် ပြည်တွင်းလုံခြုံရေးနှင့် ရပ်ရွာအေးချမ်းသာယာရေး၊ တရားဥပဒေစိုးမိုးရေး၊ မူးယစ်ဆေးဝါးအန္တရာယ်တားဆီးကာကွယ်ရေးနှင့် ပြည်သူ့အကျိုးပြုလုပ်ငန်း ဆောင်ရွက်ရေးဟူသည့် ရည်မှန်းချက်တာဝန် (၄) ရပ်နှင့် ပြစ်မှုများမဖြစ်ပွားအောင် ကြိုတင်ကာကွယ်ရေး၊ ဖြစ်ပွားပြီး ပြစ်မှုများ စုံစမ်းဖော်ထုတ် တရားစွဲတင်ရေး၊ နိုင်ငံတော်အတွင်း စည်းကမ်းသေဝပ်တည်ငြိမ်ရေး၊ ပြည်သူလူထုလုံခြုံရေး၊ မူးယစ်ဆေးဝါးနှင့် စိတ်ကိုပြောင်းလဲစေတတ်သော ဆေးဝါးများအန္တရာယ်ကို တားဆီးနှိမ်နင်းရေး၊ ပြည်သူ့အကျိုးပြုလုပ်ငန်းများ ဆောင်ရွက်ရေးဆိုသည့် လုပ်ငန်းတာဝန် (၆) ရပ်တို့ကို ထမ်းဆောင်လျက်ရှိရာတွင် ‘‘သစ္စာ၊ သမာဓိ၊ သတ္တိ’’ ဆိုသည့် ဆောင်ပုဒ်ကို ဦးထိပ်ပန်ဆင်၍ ပြည်သူ့အကျိုးစီးပွားကို ပိုမိုဆောင်ကြဉ်းနိုင်သည့် ရဲတပ်ဖွဲ့ဖြစ်လာစေရန် ဆောင်ရွက်လျက်ရှိသည်။

မြန်မာနိုင်ငံရဲတပ်ဖွဲ့သည် ယနေ့ကာလတွင် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှုမပြိုကွဲရေးနှင့် အချုပ်အခြာအာဏာ တည်တံ့ခိုင်မြဲရေးဟူသော ဒို့တာဝန်အရေး (၃) ပါးကို လက်ကိုင်ထားကာ နိုင်ငံတစ်ဝန်း အေးချမ်းသာယာရေးနှင့် တရားဥပဒေစိုးမိုးရေးတို့အတွက် တပ်မတော်၊ ပြည်သူတို့နှင့် အတူလက်တွဲကာ အကြမ်းဖက်သောင်းကျန်းသူချေမှုန်းရေးကို ရွပ်ရွပ်ချွံချွံ၊ စွန့်လွှတ်စွန့်စား ကြိုးပမ်းထမ်းဆောင်လျက်ရှိသည်။ ရဲတပ်ဖွဲ့ဝင်များ၏ တာဝန်ထမ်းဆောင်မှုကို နိုင်ငံတော်က အလေးထား အသိအမှတ်ပြုပြီး မြန်မာနိုင်ငံရဲတပ်ဖွဲ့ဆိုင်ရာ စွမ်းရည်သတ္တိနှင့် စွမ်းဆောင်မှုဆိုင်ရာ ဂုဏ်ထူးဆောင်တံဆိပ်များကို စိစစ်ချီးမြှင့်ပေးလျက်ရှိသည့်အပြင် မိမိကျရာကဏ္ဍတွင် တာဝန်ကျေပွန်စွာ ထမ်းဆောင်ရင်း အသက်ပေးလှူခြင်းနှင့် ကိုယ်အင်္ဂါအစိတ်အပိုင်း စွန့်လွှတ်သွားခဲ့ရသည့် ရဲတပ်ဖွဲ့ဝင်များ၏ ဇွဲ၊ လုံ့လ၊ စိတ်ဓာတ်နှင့် ကြိုးပမ်းမှုတို့အပေါ်တွင်လည်း နိုင်ငံတော်က ဂုဏ်ယူလေးစား အသိအမှတ်ပြုလျက်ရှိသည်။

လက်ရှိကာလ မိမိတို့နိုင်ငံ၏ အဓိကလိုအပ်ချက်မှာ နိုင်ငံတစ်ဝန်းလုံး တရားဥပဒေစိုးမိုးရေးနှင့် လုံခြုံတည်ငြိမ်မှုရှိရေးပင်ဖြစ်သည်။ အဆိုပါလိုအပ်ချက်ကို ဖြည့်ဆည်းနိုင်ရေး ဆောင်ရွက်ရာတွင် ပြည်သူလူထုနှင့် လက်တွဲပူးပေါင်း၍ ပြစ်မှုများကျူးလွန်မှုမရှိအောင် ကြိုတင်ကာကွယ်ရေး၊ အမှုအခင်းများ ဖြစ်ပေါ်လာပါကလည်း တရားခံများကို ချက်ချင်းစုံစမ်းဖော်ထုတ်ဖမ်းဆီးပြီး ပြစ်မှုအလိုက် ထိရောက်သည့် ပြစ်ဒဏ်ကျခံနိုင်ရေးတို့ကို တရားဥပဒေနှင့်အညီ စီမံဆောင်ရွက်ကြရမည်ဖြစ်သည်။ ထို့အပြင် မြန်မာနိုင်ငံရဲတပ်ဖွဲ့သည် နိုင်ငံတစ်ဝန်း ဒေသအနှံ့အပြားတွင် ပြည်သူနှင့် တိုက်ရိုက်ထိတွေ့ဆက်ဆံပြီး ပြည်သူများ၏ လူနေမှုဘဝ တည်ငြိမ်အေးချမ်းရေးနှင့် တရားဥပဒေစိုးမိုးရေးကို ဆောင်ရွက်ပေးနေရသည့် အဖွဲ့အစည်းဖြစ်သည့် အားလျော်စွာ ရဲတပ်ဖွဲ့ဝင်တိုင်းသည် ရဲတပ်ဖွဲ့၏ လုပ်ငန်းပိုင်းဆိုင်ရာ အရည်အချင်း၊ အရည်အသွေးတို့ ကောင်းမွန်ကြရန် လိုအပ်သည့်အပြင် ပြည်သူ့ဆက်ဆံရေးနှင့် ပြည်သူ့ဝန်ဆောင်မှုလုပ်ငန်းများတွင်လည်း နားလည်ကောင်းမွန်နေရန်လိုသည်။
မြန်မာနိုင်ငံရဲတပ်ဖွဲ့ကို ‘‘မျိုးချစ်စိတ် ရှိရမည်၊ စွမ်းရည် ပြည့်ဝရမည်၊ ခေတ်မီရမည်’’ ဆိုသည့် မျှော်မှန်းချက်များနှင့် တည်ဆောက်လျက်ရှိရာတွင် ပြည်သူက အထင်ကြီးလေးစားပြီး ဂုဏ်ယူအားကိုးရသည့် ရဲတပ်ဖွဲ့ဖြစ်စေရေး၊ စိတ်ဓာတ်ကောင်းမွန်၍ စွမ်းရည်ပြည့်ဝပြီး တာဝန်ကျေပွန်သော အဖွဲ့အစည်းကောင်းတစ်ရပ်ဖြစ်ရေး၊ လုပ်ငန်းကျွမ်းကျင်မှု၊ ရိုးသားဖြောင့်မတ်မှု၊ သမာသမတ်ရှိမှုနှင့် ဂုဏ်သိက္ခာမြင့်မားသော ဥပဒေဘက်တော်သားများ ဖြစ်လာရေးတို့အတွက် မြန်မာနိုင်ငံရဲတပ်ဖွဲ့ဝင် အဆင့်အတန်းအားလုံးက ကြိုးပမ်းစွမ်းဆောင်ကြရပါမည့်အကြောင်း။ ။

https://t.me/myanmarnewspaper/242971

MOI News Application အား အောက်ပါ link တွင် Download ပြုလုပ်နိုင်ပါသည်-

For Andriod
https://shorturl.at/uK23k

For IOS
https://rb.gy/vgdhqc

Subscribe to Myanmar Newspaper
https://t.me/myanmarnewspaper

Subscribe to The Global New Light of Myanmar
https://t.me/gnlmon

Subscribe to MOI
https://t.me/iprdrnd

View to mTube Video Streaming Platform
https://mtube.gov.mm

01/10/2026

၂၀၂၆ ခုနှစ်၊ အောက်တိုဘာလ ၁ ရက်နေ့ထုတ် ကြေးမုံသတင်းစာအား အောက်ပါ Link တွင် ဝင်ရောက်ဖတ်ရှု၊ Download ပြုလုပ်နိုင်ပါသည်-

https://drive.google.com/file/d/1C1xe9TPzkTqsddCFkO13TGouPjH_tqvE/view?usp=sharing

01/10/2026

၂၀၂၆ ခုနှစ်၊ အောက်တိုဘာလ ၁ ရက်နေ့ထုတ် မြန်မာ့အလင်းသတင်းစာအား အောက်ပါ Link တွင် ဝင်ရောက်ဖတ်ရှု၊ Download ပြုလုပ်နိုင်ပါသည်-

https://drive.google.com/file/d/1lfZiOgweij5EMmQKfqsPq-Iq-2x1FFpv/view?usp=sharing

IPRD Myeik News

03/10/2026

02/10/2026

02/10/2026

01/10/2026

01/10/2026

01/10/2026

01/10/2026

01/10/2026

01/10/2026

01/10/2026

Address

Website

Alerts

Shortcuts

Share

Category

Listing takedown request