17/12/2022
التاريخ 2004 ، المنتخب ديال بادو زاكي كان أول عشق كروي بالنسبة ليا و أول توني شريت كان ديال جواد الزايري رقم 7 الوسط و عليه دوارة . ربحنا نيجيريا و البنين و تعادلنا مع جنوب إفريقيا وراها الجزائر جبنا التعادل فآخر دقيقة من عند الشماخ و فأشواط ماركا حجي و زايري ، نصف النهاية مع مالي كان ماتش ساهل ربحناه ب 4 ل 0 و الفينال عمر يتنسى ليا تفرجنا مع العائلة و كلنا راسمين الراية بستيلو أحمر و أخضر كان بينا و بين لقب إفريقي 90 دقيقة ولكن للأسف خسرنا اللقب لصالح تونس . قلنا ولكن ماعليش عندنا جيل قادر يكمل و جات 2006 و تقصينا فدور المجموعات بعد ما ماركا علينا دروجبا بيلانتي و تعادلنا مع مصر و ليبيا . مشى فاخر و جا هنري ميشيل ربما يدير شي إنجاز ف 2008 و لعبنا كاس إفريقيا فغانا ، الماتش ديال ناميبيا ربحناه ب 5 ل 1 هاتريك العلودي كلنا بدينا كانقولو هو هذا المنتخب اللي غادي نعيشو معاه الفرحة ولكن صدمة مباراة غينينا و رقصات لاعبي غانا ورا كل هدف أجلات الحلم و مشى هنري اللي فاش كايجي فبالي كانتفكر الماتش ديال فرنسا اللي سالا 2 ل 2 . 2010 كانت النكسة بالنسبة للمغرب ما دزناش لكأس العالم و لكأس افريقيا و المدرب كان هو روجي لومير و وراها جات التركيبة الرباعية ديال المدربين حسن مومن ، حسين عموتة ، عبد الغني و جمال السلامي ولكن للأسف بدون أي نتيجة خسرنا مع الغابون و مع الكاميرون و تحولنا من تكرار إنجاز 2004 ل يا ربي غير ندوزو . 2012 مع غيريتس اللي تأهلنا معاه لكأس افريقيا لكن ما دزناش دور المجموعات و فإقصائيات كأس افريقيا 2013 خسرنا مع الموزمبيق ب 2 ل 0 اه الموزمبيق و مشى غيريتس و جا طاوسي و ربحناهم فالمغرب ب 4 ل 0 و فرحتنا كانت كبيرة قلنا صافي إطار وطني ولد البلاد هو اللي يصلاح و طحنا مع جنوب افريقيا البلد المنظم كيف العادة ديما طايحين مع اللي منظمين ، تعادلنا مع انغولا و الرأس الاخضر و الماتش الثالث كان خاص ضروري نربحو و لكن تعادلنا ب 2 ل 2 و كلشي كان فرحان و تا واحد ما عارف باللي الرأس الاخضر ربحات و طبعا ما دزتاش لكأس العالم 2014 . هنا كلنا بصوت واحد قلنا وا رجعو لينا بادو زاكي هو اللي يصلاح و جا سي بادو و بدا كايوجد لكاس افريقيا 2015 اللي كانت غادي تنظم عندنا و لكن جات إيبولا و حنا نقولو ليهم ما بغيناهاش جاوبونا ايوا تا نتوما ما لاعبينش و الكاف قرر يحرمنا ما نلعبوش ف 2017 و 2019 بحال ايلا حنا ناقصين هم . جا هيرفي رونار ناري ناري و لعب كاس افريقيا 2017 و لعبنا بلا حكيم زياش قلنا كرايزي مان هاد السيد ولكن معاه دزنا لدور الربع من بعد 13 عام ديال النكسات و قصاتنا مصر ببيت ملاوط ، مع رونار بدا يشعل الضو و تصالح مع زياش و لعبنا كاس العالم بعد غياب دام 20 عام بعدما قصينا الكوت ديفوار فأبيدجان . لعبنا كاس العالم و كنا واعرين ولكن الزهر و فار ايز بولشيت خلاونا نديرو خروج مشرف . 2019 فمصر ربحنا ثلاثة ديال الماتشات فدور المجموعات و النهاية راكم عارفينها لاش ما خلاهاش لبوصوفة . 2021 وصلنا للربع و عاود قصاتنا مصر . 2022 جا وليد الرگراگي باش يلعب كأس العالم فظرف شهرين كان خاصو يلقى فريق و يتحمل ضغط الجمهور باش يدير أداء مشرف و فعلا وليد دار الاداء المشرف ديال بصح ودوزنا لنصف نهائي كأس العالم الحاجة اللي عمر كنا نحلمو بيها ولا نتسناوها ، أنا واحد من الناس اللي دوزو نكسات و عاشو معهم و مرض مع المغرب حيت كانموت على المنتخب داكشي علاش من ورا الماتش ديال اسبانيا كنت كانقول اللي جا فضل انا ما كنتش كانتسنى هادشي ولا حلمت بيه و حاس باللي حنا كمغاربة صبرنا و نلنا من بعد سنوات ديال العذاب و هاد المدرب جاب معاه شي حوايج اللي رجعو لينا الثقة فالمغرب و إن شاء الله معاه غادي نعيشو الأمجاد يا ربي . شكرا وليد الرگراگي 🇲🇦❤️
بقلم أسامة رمزي اللي شحال و هو يتصدم 😂
