02/03/2025
الموقف اللي دار عبد الإله مول الحوت ماشي غير موقف عادي، هادي رجولة بمعنى الكلمة. فوسط عالم فيه اللي كايشوف الغلاء ويسكت، وفيه اللي كايستغل الفرصة باش يزيد يربح، خرج هاد الشاب المراكشي بشجاعة وجرأة، ووقف فوجه لوبي المضاربة، وقال بصوت مسموع: لا للاستغلال، لا للجشع!
هاد الرجل ما خافش، ما تراجعش، ما باعش المبدأ ديالو قدام الضغوطات. كان عارف أن اللي كايديروه بعض السماسرة ظلم للمواطن، وكان مستعد يواجه التحدي بوحدو، غير بسلاح الأمانة والنية الصادقة. وهنا كاينة المعنى الحقيقي للرجولة: أنك توقف مع الحق، حتى إلى كنت بوحدك، وحتى إلى تعرضت للهجوم.
الناس كاملين تجاوبو معاه، لأنهم شافو فيه صوت الشعب، شافو فيه ذاك المغربي الحر اللي ما كايسكتش على الظلم، اللي ما كيقبلش يكون ضحية لعبة كبار السوق. وملي تدخل والي مراكش وتفاعل معاه، عرفنا أن الحق كيرجع، وعرفنا أن الصوت النقي كيكون مسموع، حتى وسط الضوضاء.
عبد الإله أعطى درس للجميع: ما خاصناش نسكتو على الخطأ، وما خاصناش نخافو من التغيير. خاصنا نكونو قد المسؤولية، ونآمنو أن أي خطوة صغيرة يمكن تكون بداية لشي حاجة كبيرة. واليوم، حتى إلى كان هو اللي بدا هاد الشرارة، فالمسؤولية علينا كاملين باش نكملو هاد الطريق، ونوقفو ضد الغلاء والاحتكار بأي طريقة ممكنة.
بصوتي وتعبيري البسيط انا ك صاحب هاذ الصفحة H N👈🏻تحية كبيرة لهاد دري وناس مراكش وتحية من طنجة لگويرة ومننساوش الجالية المغربية 🫶🏻 عبد الاله لي عطانا درس فالكرامة والشجاعة
والعقبة لينا تا حنا نظامنو ونكونو يد وحدة ضد أي نصاب وضد أي واحد بغا يخرب صورة البلاد بالاسترزاق على ضهرنا … #عاش #الملك #
