24/01/2026
Cooman bite malee
Ani waadeen beeku
Adda baana jedhee
Ani yaadeen beeku
~
Ani yooman shakke
Akka garaa murattu
Yaadaaf ilaalcha kee
Akka narraa fudhattu
~
Badiin koo maaluma
Har'a kan na gattuuf
Garaa narraa murtee
Har'a kan na gantuuf
~
Badii kiyya naaf himi
Waan natti mufatteef
Balbala onnee keetii
Waan natti cufatteef
~
Badii koon wallaalem
Ol yaadee gad yaadee
Waadaa diiguu keedha
Kan gubee na waadee
~
Kaleessa maal jennee
Gaafa waliif kakanne
Rakkoo keenya maraa
Gaafa waliin daganne
~
Addan baanu jettee
Kakatte gaafa sana
Garuu ooltee bultee
Dagatte yaada sana
~
Har'a me maalumaaf
Kan nutti adda baanu
Silaa walumaan ture
Kan nutti tabba baanu
~
Fira dhabaa na gootee
Har'a erga na joorsitee
Bor an si arguun hawwa
Carraan kee si koorsitee
~
Iddoof bakka deemtutti
Naaf jiraadhu nagaa kee
Garuu an har'aa kaasee
Dagadheera maqaa kee
~
......✍️
