01/08/2025
تعرفي ! مستحيل، مستحيل ربي يخذل قلب صبر وتحمّل وتحمّل وتحمّل، مستحيل ربي يشوفك تنكسري وما يعوّضكش، مستحيل تعبك يروح عند الكريم، عند الرحيم، عند اللي يدبّرلك كلّش بحكمة أنتِ اليوم ما تفهميهاش، بصح غدوة؟ راح تشوفي وتقولي : الحمد لله على كل لحظة صبرت فيها، والله ما خاب ظنّي فيك يا رب !
يمكن اليوم تشوفي الضيق داير بيك من كل جهة، تحسّي الدنيا ولات رمادية، لا لون لا طعم ! بصح صدّقيني، ربي ما يكتبش الوجع عبث ! كلّش محسوب، وكل دقيقة بكيتي فيها راح يجي نهار تقولي فيه : ياااه واش درت باش نستاهل كل هاذ الخير؟
ربي إذا خذا منك حاجة، يعطيك بدالها أضعاف، بصح يمكن ما تكونش بنفس الصورة اللي كنتي تتمنايها، يمكن تكون أعظم، أنقى، وأحلى بكثييير ! بصح لازم تصبري، ما تخافيش، ما تعجزيش، ما تخليش الدنيا تزعزع ثقتك في ربّ العالمين.
ربي ما عطاكش هاذا البلاء باش يعاقبك، لااا، ربي يحبّك، ربي يرفعك، ربي يجهّزك لحاجة ما تخمّيمش فيها ! يمكن لو ما صراش اللي صرا، ما كانش يجيك الخير اللي مكتوب لك غدوة ! يمكن هاذا اللي يوجعك اليوم، هو نفسو اللي راح يكون سبب سعادتك غدوة.
أصبري ! أصبري حتى الصبر هو نفسه يتعب من صبرك، ما دام ربي معاك، واش تحتاجي أكثر؟ ما تهتميش لخذلان الناس، ما تهتميش لقساوة الدنيا ! ما دام اللي خلقك معاك، راكِ بخير، راكِ محفوظة، راكِ في الأمان، حتى لو قلبك اليوم متكسّر.
ثقي ! غير ثقي وراح تشوفي الجبر اللي يخليك تبكي وتقولي : يااااا رب، ما توقعت الخير يكون بهاد العظمة ꜝ 🤭💟.)"
